Во Музејот на град Скопје со пригодна програма вчера беше официјално отворена изложбата на фотографии „Секојдневен живот“ во организација на Национална установа Центар за култура на турската заедница во земјава.

Изложени се 60 фотографии од три локални аматерски фотографи, Хусамедин Гина, Лејла А. Курт и Ердем Ахмет, по 20 дела од секој автор.

Преку објективот на авторите, публиката има можност да ја доживее убавината на обичните моменти од секојдневието, пренесени со искреност и естетика.

„Изложбата открива три различни перспективи од секојдневието, интимна, реалистична и поетска. Целта е да инспирира, поттикне размислување и понуди едно ново визуелно доживување. Трите уникатни стилови се спојуваат во хармонична целина што го слави обичното, но суштинското, животот самиот“, пишува во каталогот посветен на изложбата.

Целта на изложбата е да се поддржат локалните уметници и да се зајакне културната размена и поврзаност во заедницата. Настанот е отворен за сите љубители на фотографијата и културата.

Изложбата е реализирана со поддршка на Министерството за култура и туризам на Република Северна Македонија и е дел од Годишната програма на Националната установа за 2025 година.

Изложбата ќе биде отворена за посетители до 19 јуни 2025 година.