Во првиот натпревар од финалето на НБА, Индијана Пејсерс направи пресврт и ја победи Оклахома Сити Тандер со 111:110, а Тајрис Халибартон го постигна победничкиот кош во последната секунда.

Пејсерс не водеа во ниту еден момент од натпреварот сè додека Халибартон не постигна кош од 6 метри на 0,3 секунди до крајот и поведе со 1:0 во серијата од седум натпревари.

Ова е по четврти пат во плејофот Халибартон да го реши натпреварот. Во петтиот натпревар од првото коло од плејофот против Милвоки Бакс, Халибартон постигна леј-ап на 1,3 секунди до крајот на продолжението и им ја донесе победата на Пејсерс во серијата. Во вториот натпревар од второто коло, тој погоди тројка на 1,1 секунда до крајот за да ѝ даде на Индијана водство против Кливленд Кавалирс. И во првиот натпревар од финалето на Источната конференција, Халибартон погоди уште еден шут кој на почетокот изгледаше како тројка, но беше променет во два поени и натпреварот отиде во продолжение против Њујорк Никс. Индијана на крајот победи.

Индијана синоќа заостануваше со дури 15 поени во четвртата четвртина, но ја намали разликата на еден поен на 48,6 секунди до крајот кога Паскал Сиакам ја врати промашената тројка од Ендру Нембхард. Потоа „Тандер“ ја имаа топката во рацете на најкорисен играч Шаи Гилџус-Александар со шанса за победа.

Меѓутоа, Нембхард со одлична одбрана го принуди Гилџус-Александар да ја изгуби топка што ја отвори вратата за камбек.

На 11 секунди до крајот, тренерот на Пејсерс, Рик Карлајл, му веруваше на својот тим и не побара тајм-аут. Халибартон се проби низ теренот и застана веднаш по линијата за три поени, а потоа постигна кош.

Индијана победи и покрај тоа што имаше 25 загубени топки од кои 20 само во првото полувреме.

„Тоа не е рецепт за победа“, рече Халибартон. „Не можеме толку многу да ја губиме топката... (но) кога ќе дојдат мај и јуни, не е важно како ќе ги добиете, само да ги добиете.“

Серијата продолжува со втор натпревар во недела исто така во Оклахома Сити.

„Серијата не се игра во еден добеин натпревар, туку во четири“, рече Гилџус-Александар.

„Значи, имаме уште четири натпревари за победа. Тие имаат три, и тоа е ситуацијата во која се наоѓаме.“

Гилџус-Александар ја предводеше Оклахома Сити со 38 поени, Џејлен Вилијамс постигна 17 поени, шутирајќи 6 од 19. Сиакам ја предводеше Индијана со 19 поени и 10 скока. Оби Топин постигна 17 поени од клупата, Тарнер имаше 15, а Нембхард имаше 14. Халибартон заврши со 14 поени, 10 скока и шест асистенции.