Холандската полиција уапсила повеќе од 90 лица за време на пропалестинските демонстрации што ескалираа синоќа пред градското собрание во Ротердам, соопшти локалната полиција.

Според официјалните соопштенија, протестите биле прекинати откако некои од учесниците не ги почитуваа договорените услови и одбија да ја напуштат областа и покрај повеќекратните предупредувања од полицијата, објави НЛ Тајмс.

Протестите беа организирани со цел осуда на наводната улога на данската бродска компанија „Маерск“ и пристаништето во Ротердам во олеснувањето на испораката на компоненти за борбените авиони Ф-35 во Израел.

Според претходниот договор со градските власти, протестот требало да заврши во 19.30 часот, но голем број демонстранти останале на местото. Поради ескалацијата на ситуацијата, градоначалничката на Ротердам, Карола Шутен, одлучила официјално да го заврши протестот во 20 часот.

Полицијата одговори на протестот со сила, распоредувајќи полициски кучиња и користејќи агресивна тактика за растерување на толпата.