Фармацевтската компанија Фајзер денеска го суспендираше развојот на лекот против дебелина, откако беше откриено дека учесник во испитувањето на лекот претрпел оштетување на црниот дроб, потенцијално поврзано со лекот.

Компанијата соопшти дека ќе престане да го проучува „дануглипрон“ откако учесник во едно од испитувањата доживеал оштетување на црниот дроб предизвикано од лекови, пренесува АП.

„Верзија на пилулата, која се дава еднаш дневно, беше во рано тестирање, а истражувачите се обидуваа да ја најдат најдобрата доза за пациентите“, рече портпаролката.

Компанијата имаше намера да го премести лекот во доцна фаза на тестирање, што обично е последната фаза на развој пред компанијата да поднесе потенцијален третман до владините регулатори за одобрување.

Официјален претставник на компанијата рече во соопштението дека Фајзер сè уште планира да развие други потенцијални третмани за дебелина во раните фази на тестирање.

Третманот за дебелина во моментов е еден од најпрофитабилните сектори за фармацевтските компании, но сите одобрени лекови досега се даваат со инјектирање, поради што компаниите се обидуваат да развијат орален третман.