Директорот на американското Федерално биро за истраги (ФБИ), Каш Пател, изјави дека се покренува истрага за „зголемување на насилните активности насочени кон Тесла“.

 „ФБИ истражуваше насилни активности против Тесла. Во изминатите неколку дена презедовме дополнителни дејствија во врска со овие инциденти. Ова е домашен тероризам. Одговорните ќе бидат фатени и изведени пред лицето на правдата“, рече Пател.

Aмериканскиот претседател Доналд Трамп во петокот го осуди нападот на паркингот на застапништвото на Тесла во Лас Вегас, велејќи дека сторителите имаат „многу добри шанси да завршат во затвор на 20 години“.

Полицијата во Лас Вегас потоа објави дека напаѓачот запалил неколку автомобили Тесла користејќи молотови коктели и испукал три куршуми кон возилата изложени на продажниот паркинг на компанијата.

Салоните на Тесла, во сопственост на американскиот милијардер Илон Маск, беа цел на протести низ САД.

Маск, кој го предводи и Одделот за владина ефикасност (ДОГЕ), ги предводи напорите за намалување на трошоците во американската сојузна влада, што резултираше со отпуштања на илјадници вработени и откажување на стотици договори за помош од САД.