Украина и САД вчера потпишаа меморандум што ги поставува темелите за идно економско партнерство и соработка во развојот на минерали, изјави украинската министерка за економија, Јулија Свириденко.

„Со задоволство ја објавуваме веста за потпишувањето на меморандумот за намери со нашите американски партнери,“ напиша Свириденко на социјалната мрежа Икс.

Таа нагласи дека договорот отвора пат за економско партнерство и формирање инвестициски фонд кој ќе помогне во обновата на Украина.

„Следниот чекор е финализирање на текстот на договорот, потоа негово официјално потпишување и ратификација во парламентот“, изјави министерката.

„Нè чека многу работа,“ истакна Свириденко, „но моменталното темпо и значителниот напредок ни даваат причина да очекуваме дека документот ќе биде од голема корист за двете земји.“

Украинската влада го објави текстот на меморандумот за Договорот за економско партнерство што земјата го потпиша со Соединетите Американски Држави, пренесе Укринформ.

Како што е наведено, меморандумот предвидува дека САД ќе ги почитуваат обврските на Украина во врска со пристапувањето во Европската унија или договорите со меѓународните финансиски институции и другите официјални кредитори, односно дека договорот за економско партнерство не може да го загрози европскиот пат на Украина.

На веб-страницата на владата на Украина е забележано дека „двете страни го препознаваат придонесот на Украина за зајакнување на меѓународниот мир и безбедност преку доброволно напуштање на третиот најголем арсенал на нуклеарно оружје во светот“.

Во владиното соопштение се додава дека меморандумот „ја потврдува желбата на американскиот народ да инвестира заедно со украинскиот народ во слободна, суверена и безбедна Украина“.

Инаку, договор кој предвидуваше пристап на САД до ретките минерали на Украина требаше да биде потпишан во Белата куќа кон крајот на февруари, но беше откажан поради жестокиот спор меѓу американскиот претседател Доналд Трамп и украинскиот претседател Владимир Зеленски.