Рускиот министер за надворешни работи Сергеј Лавров денеска изјави дека двете рунди преговори меѓу руската и украинската делегација за потенцијално примирје дале конкретни резултати, дека биле „важни и корисни“ и дека тие функционирале.

Зборувајќи на состанокот на Кабинетот на министри на Русија со претседателот на земјата, Владимир Путин, тој рече дека одбивањето на украинскиот претседател Володимир Зеленски да прекине со огнот на фронтот за да се соберат мртвите и ранетите е „сериозна грешка“.

„Верувам дека острото отфрлање на Зеленски е едноставно голема грешка од страна на режимот во Киев“, рече Лавров.

Тој оцени дека е важно да не се подлегне на најновите провокации насочени кон попречување на руско-украинските преговори.

„И покрај новите големи криминални провокации во последните неколку дена, би сметал дека е важно да не се подлегне на овие провокативни дејствија, кои јасно имаат за цел да ги нарушат преговорите и да продолжат да добиваат оружје од европските земји“, смета Лавров.

Тој изјави дека е добро што постојат канали за комуникација со Киев, бидејќи тоа придонесува за решавање на хуманитарните прашања.

„Токму координацијата на состаноците и хуманитарните чекори како гестови на добра волја, како мерка за зајакнување на довербата, е веројатно неопходна во оваа фаза. Покрај тоа, тука има вистински напредок“, рече Лавров.