Генералниот секретар на ОН, Антонио Гутереш во понеделникот најави намалување на присуството на ОН во Газа, наведувајќи ја ескалацијата на израелското насилство и зголемените закани за хуманитарниот персонал, вклучително и нападот врз комплекс на ОН минатата недела во кој загина еден работник на ОН.

„Израел во изминатата недела изврши разорни напади врз Газа, одземајќи ги животите на стотици цивили, вклучително и персонал на Обединетите нации, а од почетокот на март не беше дозволена хуманитарна помош да влезе во Појасот“, се вели во соопштението од канцеларијата на портпаролот на Гутереш.

Велејќи дека генсекот „донесе тешка одлука да го намали присуството на Организацијата во Газа, дури и кога се зголемуваат хуманитарните потреби и се интензивира нашата загриженост за заштитата на цивилите“, во изјавата сепак се нагласува: „ОН не ја напуштаат Газа“.

„Организацијата останува посветена да продолжи да обезбедува помош од која зависат цивилите и нивниот опстанок и заштита“, се вели во извештајот.

Во соопштението понатаму се истакнува дека израелската влада ја блокира хуманитарната помош во Газа повеќе од три недели, нарекувајќи ја „најдолгата таква суспензија од 7 октомври 2023 година“, кога започна нејзината смртоносна офанзива.

„Израелските власти посочија дека имаат намера да ги продолжат своите воени активности во Газа. Врз основа на моментално достапните информации, нападите што го погодија комплексот на ОН во Деир Ал Балах на 19 март беа предизвикани од израелски тенк“, се вели во извештајот.

Гутереш остро го осуди минатонеделниот израелски напад врз комплекс на ОН што доведе до смрт на член на персоналот на ОН од Бугарија и сериозни повреди на уште шестмина.

„Локацијата на овој комплекс на ОН им беше добро позната на страните во конфликтот“, се истакнува во него.

Гутереш побара „целосна, темелна и независна истрага“ за израелскиот напад и нагласи дека сите страни се „обврзани со меѓународното право да ја заштитат апсолутната неповредливост на просториите на ОН“.

„Сите држави мора да ги искористат сите свои моќи за да го запрат конфликтот и да обезбедат почитување на меѓународното право- со примена на дипломатски и економски притисок и борба против неказнивоста“, се додава.

Повторувајќи го својот повик за итен прекин на огнот, Гутереш повика да се стави крај на страдањата во Газа.