Пратениците во Собранието на Косово ниту во средата не ја избраа за претседател Албулена Хаџиа, која беше предложена од движењето Самоопределување, со што по петти пат не успеа да се конституира новиот состав на парламентот, а седницата беше одложена за петок.

Претставничката на движењето Самоопределување, Мимоза Кусари-Лила во изјава за новинарите во Приштина ги отфрли барањата на претставниците на опозицијата кои бараат од владеачката Самоопределување да го смени својот кандидат за претседател на Собранието.

„Албулена Хаџиу е жената со најмногу гласови на парламентарните избори, односно три пати повеќе гласови од претходниот претседател Рамуш Харадинај или двојно повеќе од целата група на Алијансата за иднината на Косово. Исто така, во споредба со самиот лидер на опозицијата, г-ѓа Албулена Хаџиу е 30 илјади гласови пред г. Красниќи“, рече кусари Лила.

Хаџиу на прес-конференција предупреди дека во последните денови била изложена на говор на омраза кој за никого не е прифатлив и потсети дека во текот на нејзината политичка кариера никогаш не гласала за нешто што е спротивно на законите на Република Косово.

Седницата ќе продолжи во петок.

Од потребниот минимум 61 глас, Хаџиу досега има добиено 57 гласа за претседател на Собранието на Косово, 48 од движењето Самоопределување и девет од претставниците на заедниците.

Конститутивната седница почна на 15 април, но четири пати беше прекината, прво поради тоа што во два наврати не беа потврдени мандатите на пратениците, а потоа и поради неуспешниот обид да се избере кандидат на Самоопределување за претседател на Собранието.