Полицијата во вторник под строги безбедносни мерки изврши рација во клиниката „Оливос“ во Буенос Аирес, главниот град на Аргентина, каде што беа запленети медицинските досиеја на легендарниот фудбалер Диего Армандо Марадона, како дел од истрагата за неговата смрт во 2020 година.

Операцијата ја водеше Единицата за сложени кривични дела на полицијата во Буенос Аирес, по наредба на судиите од кривичниот суд и на барање на обвинителот Патриши Ферари.

Властите бараат исчезната медицинска документација, која се однесува на процедурите извршени врз Марадона помеѓу 11 и 13 ноември 2020 година, само неколку дена пред неговата смрт.

Претресот следеше по сведочењето на директорот на клиниката „Оливос“, Пабло Димитроф, чии изјави, според извори блиски до истрагата, отворија нови сомнежи за можна небрежност во третманот на познатиот спортист.

Диего Марадона почина на 25 ноември 2020 година од срцев удар, а околностите под кои почина со години предизвикуваат контроверзии и судски постапки во Аргентина.

Во тек е судењето на седум медицински професионалци кои се грижеа за легенданиот аргентински фудбалер пред неговата смрт, а на кои им се суди за убиство од небрежност.