Градските власти на Венеција од петокот повторно наплаќаат пет евра за посета на градот, а оваа сума ќе биде двојно поголема за оние кои ќе резервираат билет гпреку интернет на само три дена пред нивното пристигнување, јавуваат италијанските медиуми.
Посетата на градот нема да се наплаќа за оние кои резервираат ноќевање во Венеција, како и туристи од поширокиот регион Венето и деца под 14 години.
Градската управа им стави на располагање на туристите 54 датуми за кога можат да резервираат билет преку Интернет за да го посетат градот, се наведува на веб-страницата Veneziatoday.
Претежно станува збор за викенд денови, во периодот од 18 април до 27 јули, во временски интервал од 8:30 до 16:00 часот по локално време.
Доколку гостинот резервира хотелска соба, тој сепак ќе мора да ја регистрира својата посета на посебна веб-страница.
Туристите ќе добијат QR код што потоа треба да им го покажат на властите кои патролираат на главните точки за влез во градот, како што е железничката станица Санта Лусија.
Повеќе од 35.000 туристи веќе резервирале билет за посета на Венеција.
Градските власти лани на овој начин инкасирале 2,4 милиони евра.
Целта е да се одвратат од посета на градот оние кои остануваат во Венеција, која е преоптоварена со туристи, само преку ден, а не и преку ноќ.
Венеција минатата година забележа рекордни 3,9 милиони ноќевања, но десетици илјади други секојдневно се слеваа во тесните улички на градот, често од бродови за крстарење, за да ги видат знаменитостите, вклучувајќи го плоштадот Свети Марко и мостот Риалто.
Се проценува дека околу 15 милиони туристи пристигнуваат во Венеција секоја година, што го прави еден од најпосетуваните градови во светот. Масовниот туризам значи големи приходи за градскиот буџет, но предизвикува и значителни штети.
Венеција, која се простира на повеќе од 100 мали острови и островчиња во североисточна Италија, се смета за еден од најубавите градови во светот.
УНЕСКО го вброи градот и неговата лагуна како светско наследство во 1987 година, наведувајќи го како „извонредно архитектонско ремек-дело“.
Сепак, организацијата на ОН се закани дека ќе ја стави Венеција на својата листа на загрозено наследство, наведувајќи ги како причини масовниот туризам и зголемувањето на нивото на водата што се припишува на климатските промени.
