Рускиот претседател Владимир Путин е подготвен да ја заврши војната во Украина, со писмено ветување од западните лидери дека ќе го спречи проширувањето на НАТО на исток, како и со укинување на некои санкции против Русија, објавува британската агенција Ројтерс, повикувајќи се на три анонимни извори запознаени со преговорите.

„Путин е подготвен да склучи мир, но не по секоја цена“, изјави висок руски извор запознаен со позицијата на највисоко ниво во Кремљ, кој разговараше со Ројтерс под услов да остане анонимен.

Три руски извори ѝ рекоа на агенцијата дека Путин сака „писмена“ гаранција од големите западни сили да не го прошируваат НАТО алијансата на исток, што всушност значи формално исклучување на Украина, Грузија и Молдавија и другите поранешни советски републики од членство.

Русија, исто така, сака неутралност на Украина, укинување на некои западни санкции, решавање на прашањето на замрзнатите руски средства на Запад и заштита на рускојазичните области во Украина.

Кремљ, според изворите, верува дека Русија може да ја продолжи војната со години, без оглед на санкциите и економскиот притисок од Западот.

Друг извор посочува дека Путин е сè помалку склонен кон компромис по прашањето за територијата и дека останува на ставот дека Русија полага право на четири региони во источна Украина.

Од друга страна, Киев постојано повторува дека Москва не може да има право да стави вето на целта на Украина за приклучување кон НАТО и бара силни безбедносни гаранции од Западот со цел да ги одврати идните руски напади, според агенцијата.

НАТО постојано потврдува дека нема да ја менува политиката на „отворени врати“ поради руските барања, но портпаролот на Алијансата не одговори на прашањата на Ројтерс за овој услов на Путин.