Генералниот секретар на НАТО, Марк Руте, денеска изјави дека на претстојниот самит во Хаг ќе предложи достигнување нова цел од страна на државите членки кога се трошоцте за одбрана во прашање. Според Руте со одвојување на 5% од БДП тие ќе придонесат за зајакнување на сојузничкото одвраќање во услови на растечки глобални закани.

 Зборувајќи на прес-конференција по состанокот на министрите за одбрана на НАТО во Брисел, Руте рече дека предложената цел вклучува 3,5% за основни трошоци за одбрана и 1,5% за инвестиции поврзани со одбраната, како што се инфраструктурата и индустрискиот капацитет.

 “Се согласивме за амбициозен нов сет на цели за способности. И ова е толку важно, овие цели точно опишуваат во кои способности сојузниците треба да инвестираат во наредните години“, рече тој, нарекувајќи ја одлуката „историска“.

 Тој потврди дека новата цел ќе важи за сите сојузници, вклучително и САД, и изрази увереност дека ќе се постигне конечен договор пред самитот, кој е закажан за 24-25 јуни.

 „Постои широка поддршка“, рече тој, додавајќи дека се очекува декларацијата од самитот да се фокусира на трошењето, индустриското производство за одбрана и поддршката за Украина.

 Руте, исто така, ја потврди улогата на НАТО како нуклеарен сојуз „сè додека постои нуклеарно оружје“, предупредувајќи дека зголемувањето на производството на одбранбената индустрија е од суштинско значење за одржување на одвраќањето.