Украина соопшти дека три лица загинале, а 31 се повредени во напад на руско беспилотно летало врз југоисточниот град Днепар.

„Масивен напад со беспилотно летало доведе до трагични последици. Три лица загинаа во Днепар, меѓу кои и едно дете“, се вели во соопштението објавено од гувернерот на Днепропетровск, Серхиј Лисак на Телеграм.

Тој додаде дека општинските работници се на местото на нападот, а полицијата и хуманитарните организации поставиле шатори.

„Оштетени се најмалку 15 згради, вклучувајќи студентски домови, образовни институции и погони за преработка на храна“, објави и градоначалникот на Днепро Борис Филатов на Телеграм.

Во меѓувреме, украинските воздухопловни сили тврдат дека нивната противвоздушна одбрана пресретнала 25 од 75 руски беспилотни летала, кои летале над регионите Доњецк, Харков, Суми и Дњепропетровск.

Украинскиот претседател Владимир Зеленски го повтори повикот да се изврши поголем притисок врз Русија за прекин на конфликтот и обезбедување стабилен мир.

„Секој одбранбен пакет од нашите партнери за Украина во моментов, секоја форма на поддршка од светот за нашата отпорност, е буквално заштита на животите“, објави Зеленски на Х.

Руските власти се уште не ги коментирале нападите.