Фудбалерите на Пари Сен Жермен и Барселона се првите полуфиналисти во Лигата на шампионите, откако ги елиминираа Астон Вила и Борусија Дортмунд.

По победата со 3:1 во Париз, ПСЖ загуби со 3:2 во Бирмингем и покрај тоа што водеше со 2:0, но се пласираше, додека Барселона беше поразена од Борусија Дортмунд со 3:1, по победата со 4:0 на домашен терен.

ПСЖ поведе на Вила Парк во 12. минута, кога Ашраф Хакими наиде на одбиена топка и ја испрати во мрежата со прецизен удар од 12 метри. Сите дилеми околу полуфиналистите ги реши Нуно Мендеш во 28. минута по контранапад и асистенција на Усман Дембеле.

Надежта на домаќините им ја врати Јури Тилеманс со голот во 35. минута по додавањето на Џон Мекгин, кој израмни на 2:2 во 55. минута. Три минути подоцна Езри Конса донесе целосен пресврт и водство на домашните, а истиот играч пропушти колосална шанса на крајот од мечот да го доведе натпреварот во продолжение.

Во Дортмунд Серу Гираси го постигна водечкиот гол за Борусија во 11. минута од пенал кој го направи гостинскиот голман Војќех Шчесни. Гираси во 49. минута ја удвои предноста на домашните по гужва во петерецот по корнер и со тоа им донесе надеж на домашните навивачи дека е можен чудесен пресврт. Но Барселона со автоголот на Рами Бенсебаини во 54. минута ги реши сите дилеми околу пласманот во полуфиналето.

Во 76. минута Гираси го комплетираше хет-трикот по големата грешка на капитенот на Барселона Роналд Араухо и стигна до својот 14. гол во Лигата на шампионите оваа сезона.

Барселона во полуфиналето ќе игра против подобриот од дуелот меѓу Интер и Баерн, а ПСЖ против победникот од дуелот помеѓу Реал и Арсенал, кои се играат утре.