Претседателот на Соединетите Американски Држави, Доналд Трамп, денес изјави дека претседателот на Кина, Кси Џинпинг, е „строг“ и дека е „исклучително тешко да се постигне договор со него“.

„Го сакам кинескиот претседател Си, отсекогаш сум го сакал и отсекогаш ќе го сакам, но тој е многу строг и е исклучително тешко е да се постигне договор со него“, рече Трамп во објава на неговата платформа Вистина (Truth Social), објави Ројтерс.

Портпаролката на Белата куќа, Каролин Левит, изјави во понеделник дека Трамп ќе разговара со Кси оваа недела.

Кина во понеделникот објави дека обвинувањата на американскиот претседател Доналд Трамп дека Пекинг го прекршил договорот постигнат за време на трговските преговори меѓу двете земји во Женева минатиот месец се неосновани, најавувајќи дека ќе преземе мерки за заштита на своите интереси.

Американскиот Трговски суд, пак, пресуди дека Трамп ги пречекорил своите овластувања со наметнување на поголемиот дел од своите царини за увоз од Кина и други земји во согласност со законот за вонредни овластувања.

Помалку од 24 часа подоцна, федералниот апелационен суд ги врати царините, велејќи дека ја паузира одлуката на трговскиот суд за да ја разгледа жалбата на владата.

Трамп, пак, синоќа потпиша извршна наредба со која се зголемуваат царините за увоз на челик и алуминиум од 25 на 50 проценти, а таа стапи на сила на полноќ по локално време.

Мерката се однесува на сите трговски партнери освен на Велика Британија, која е единствената досега што постигна прелиминарен трговски договор со САД за време на 90-дневната пауза од воведувањето на поширок пакет царини.