Вторпат пропадна конститутивната седница на косовското Собрание, на која требаше да положат заклетва новите пратеници и да бидат именувани спикерот и замениците на Собранието.

По консултацијата на претставниците на парламентарните партии во просторија одредена од секретарот на Собранието на Косово, меѓу нив не беше постигнат договор како понатаму.

Претседавачот на седницата на косовското Собрание, Авни Дехари, рече дека на средбата имало претставници што ги искажале своите ставови, но и оние што ја напуштиле салата. Според Дехари, кога седницата била прекината вторпат, во салата имало 100 пратеници.

„Средбата ги откри нивните сегашни позиции. Имаше претставници што се откажаа од консултациите. За жал, немаше консензус. Седницата ќе продолжи во рок од 48 часа, во 12 часот на 19 април 2025 година, со надеж дека дотогаш ќе има договор“, нагласи Дехари.

Вршителката на должност министер за правда од Движењето Самоопределување, Албулена Хаџиу, по седницата изјави дека на консултативната средба немало консензус и, според неа, партиите имале спротивставени позиции.

„Во писмото што претседателката Османи го упати до претседавачот со конститутивната седница се бара решение за да се спречи блокирањето на конституирањето на Собранието, а за да се дојде до ова решение потребни се консултации. Денес бевме подготвени да дадеме свој придонес за можните решенија што можеби ги имаме пред нас“, потенцираше Хаџиу.

Таа рече дека Движењето Самоопределување сака да ја исправи погрешната одлука на косовското Собрание каде што на 15 април гласаа против легитимизирањето на новите пратеници, но треба да видат кој е начинот да се поправи таа одлука бидејќи такво нешто не е предвидено ниту со Уставот, ниту со одлуките на Уставниот суд, ниту со Деловникот на Собранието.

Лидерот на Демократската партија на Косово (ПДК), Мемли Красниќи, по седницата изјави дека првата партија узурпирала уставно право, според него, со попречување на текот на седницата.

Красниќи рече дека Движењето Самоопределување нема бројки за формирање институции и со овие постапки се обидува да купи време, да купи уште 48 часа.

„Наместо да се спроведе сценариото на седницата, ова право го злоупотреби најстариот пратеник што ја водеше седницата, за остварување на партиските цели. Овие луѓе не само што немаат мнозинство туку не се ни блиску до мнозинство. Ги повикувам да не го држат во заложништво формирањето на институциите на Косово“, нагласи Красниќи.

И лидерот на Демократската лига на Косово (ЛДК), Лумир Абдиџику, изјави дека претседавачот на седницата неправедно ја прекинал денешната седница иако имало кворум и услови да продолжи гласањето.

„Ова е сериозно прекршување, невообичаена практика, обратно политичко однесување за кое немаме оправдување, но сепак ќе се сретнеме за 48 часа за да ги кажеме нашите позиции“, нагласи Абдиџику.

Конститутивната седница на Собранието на Косово не беше успешна ни на 15 април откако не беше изгласана првата точка од дневниот ред, онаа за одобрување на извештајот на Комисијата за верификација на кворумот и мандатите. За овој извештај не гласаа опозициските партии ПДК, ЛДК и ААК, кои тврдеа дека актуелниот премиер Албин Курти не поднел навреме оставка од извршната функција за да стане пратеник.

Во вторник, но и денес, 17 април, се очекуваше прво да положат заклетва пратениците, потоа да се назначат претседателот на Собранието на Косово и замениците на претседателот, а потоа да се отвори можност за гласање за новата Влада на Косово.