Обвинителството на Босна и Херцеговина издаде наредба за апсење на претседателот на Република Српска, Милорад Додик, премиерот на ентитетот Радован Вишковиќ и претседателот на Народното собрание на Република Српска, Ненад Стевандиќ.

Иако се уште не е официјално потврдено од Обвинителството на БиХ, бројни медиуми, меѓу кои и РТРС, во средата објавија дека е издадена наредба до судската полиција и дека е побарана помош од Министерството за внатрешни работи на РС и и Државната агенција за истраги и заштита (СИПА).

Обвинителството ги товари за сторено кривично дело „напад врз уставниот поредок“.

Информацијата е објавена во пресрет на двете специјални седници на Народното собрание на РС закажани за денеска, на кои ќе биде вклучен предлогот за нов устав на ентитетите и предлог-законот за заштита на уставниот поредок на тој ентитет.

Делегатот во Домот на народите на Парламентарното собрание на БиХ и портпарол на СНСД, Радован Ковачевиќ, во својата реакција до Х, рече дека „никој не сака и не може да го уапси државниот врв на Република Српска“.

„Република Српска не прави никаков напад на уставниот поредок, туку напротив, носи одлуки на кои има право според Уставот на БиХ и на Република Српска. Начинот на кој неуставното обвинителство на БиХ се обидува да го инкриминира државното раководство на Република Српска повторно се заснова на неуставни, неовластени и незаконски измени на Кривичниот законик на БиХ од страна на незаконскиот и нелегитимен странски државјанин Кристијан Шмит“, рече Ковачевиќ.

Тврдејќи дека ова е „очигледен и недвосмислен политички напад врз Република Српска“, Ковачевиќ исто така рече дека „овој тип на политички напад нема да ја потресе Република Српска, која ќе го продолжи процесот на донесување политички одлуки на што има право според Уставот, а на секоја форма на радикализација од Сараево ќе биде жестоко одговорено. Политички и институционално“.

Политичката криза и тензијата во Босна и Херцеговина се интензивираа со усвојувањето и последователното потпишување на указ за спроведување на контроверзните закони во босанско-херцеговскиот ентитет Република Српска, кој ја забрани работата на некои државни институции во тој дел од земјата.

Указите беа потпишани од претседателот на ентитетот Милорад Додик, претходно осуден за непочитување на одлуките на високиот претставник во БиХ. Уставниот суд на БиХ привремено ги суспендираше законите.