Во Европа има многу луѓе кои го делат ставот на Русија, но не сите зборуваат за тоа, изјави синоќа рускиот претседател Владимир Путин и додаде дека се надева дека еден ден Русија ќе ги обнови односите со Европа, и покрај сегашните тензии предизвикани од војната во Украина.

Зборувајќи на форумот „Знаењето на прво место“ во Москва, Путин рече дека на Запад сè уште има луѓе кои ги делат руските вредности, вклучувајќи ги и оние кои се борат на страната на Русија во Украина.

„Ситуацијата сега е покомплицирана отколку што беше за време на Големата патриотска војна (Втората светска војна)... Но, не се сомневам дека порано или подоцна нашите односи со Европа ќе бидат обновени. Тоа е сигурно“, рече Путин.

„Во Европа како целина, има многу луѓе кои го делат нашиот став. Многумина. Некои молчат, некои изразуваат нешто многу скромно, така што не се особено слушнати. Секако, малкумина се луѓето кои, под притисок од официјалните власти, имаат храброст да го искажат својот став. И не само да го искажат, туку да покажат дека го имаат тој личен став“, рече тој за време на состанокот со учесниците на образовниот маратон „Знаењето на прво место“.

Путин рече дека во Франција отсекогаш имало луѓе кои ги делеле руските вредности и дека такви граѓани постојат и денес.

„Важно е што отсекогаш постоеле луѓе кои ги делеле и денес ги делат нашите принципи, вредности и луѓе кои се со нас. Дури и денес, некои граѓани на Република Франција се борат рамо до рамо со нашите борци во зоната на специјални воени операции“, рече Путин.

Шефот на руската држава додаде дека овие граѓани ја нарекле својата единица „Нормандија-Неман“, исто како нивните дедовци и прадедовци, француски патриоти кои, и покрај поразот на Франција, се бореле заедно со советската армија за време на Втората светска војна.