Манчестер Јунајтед- Атлетик Билбао и Тотенхем - Бодо/Глимт се полуфиналните двојки на Лига Европа, додека во полуфиналето на Лигата на конференции ќе играат Бетис - Фиорентина и Челзи - Ѓургарден, по вчерашните четвртфинални реванш натпревари во двете натпреварувања.

Фудбалерите на Манчестер Јунајтед во дербито на вечерта, а можеби еден од најинтересните натпревари сезонава на домашен терен го победи Лион со 5:4 (2:0, 2:2) во реваншот од четвртфиналето, кој изобилуваше со пресврти.

Јунајтед водеше со 2:0 по првите 45 минути благодарение на головите на Угарте (11) и Далот (45+1), а со оглед на тоа дека првиот меч во Лион заврши 2:2, англискиот тим ги имаше и тие два гола предност во вкупниот резултат.

Сепак, Лион израмни на 2:2 преку Толисо (71) и Таљафико (78) и избори продолженија.

Но дополнителните половина час францускиот тим го започна со играч помалку бидејќи Толисо беше исклучен во 89. минута. И со играч помалку, Лион поведе со 4:2 со головите на Черки (104) и Лаказет (109-11м) и се чинеше дека Французите ќе изборат пласман во полуфиналето.

Меѓутоа, од 114. до првата минута од судиското продолжение, Јунајтед постигна три гола за нов голем пресврт на овој несекојдневен натпревар. Бруно Фернандеш (114-11м) реализираше пенал, а Маино (120) и Мегваер (120+1) погодија во самиот финиш на натпреварот.

Противник на Манчестер во полуфиналето ќе биде Атлетик Билбао, кој вчера со 2:0 го елиминира Ренџерс, откако првиот натпревар беше 0:0.

Втората полуфинална двојка во Лига Европа ја сочинуваат Тотенхем и Бодо/Глимт. Тотенхем го победи Ајнтрахт во тензичен натпревар. По ремито 1:1 во Лондон во првиот натпревар, Тотенхем вчера славеше со 0:1 на гостувањето во Франкфурт.

Норвешкиот шампион Бодо/Глимт постигна историски успех исфрлајќи го Лацио по подобро изведување на пенали. Римскиот тим ја надополни негативата од два гола од првиот меч во Норвешка со головите на Кастеланос (20) и Нослин (90+3) за продолжение.

Диа (99) ги однесе домаќините до 3:0 и надеж за пласман. Сепак, Хелмерсен (109) со својот гол за 3:1 успеа да го одведе натпреварот до пенали, а во престрелката гостите беа поуспешни со 3:2.

Вчера се одиграа и реванш натпреварите од четврт-финалето на Лигата ба конференции.

Фиорентина и Целје ремизираа 2:2, а тимот од Фиренца се пласираше во полуфиналето поради предноста од 2:1 од првиот меч.

Фиорентина во полуфиналето ќе игра против Бетис, кој одигра 1:1 со Јагелонија во Полска, но беше подобра со 2:0 на првиот меч во Шпанија.

Во другата полуфинална двојка ќе се сретнат Челзи и Ѓургарден.

Лондонски Челзи беше поразен на „Стемфорд Бриџ“ од Легија Варшава со 1:2, но се пласираше во полуфиналето благодарение на убедливата победа (0:3) во првиот натпревар.

И фудбалерите на шведскиот Ѓургарден го постигнаа најголемиот клупски успех на европската сцена победувајќи го Рапид во Виена со 1:4 (1:2) по продолженијата во реваншот од четвртфиналето, со што го надополнија поразот во Стокхолм од 0:1.

Рапид уште во седмата минута остана со фудбалер помалку, а мечот го завршија со деветмина играќи по уште едно исклучување во 110. минута.