Ректорот на Универзитетот во Белград, Владан Ѓокиќ, во петокот даде изјава во Управата на криминалистичката полиција во главниот град на Србија, во рамките на предистражната постапка за кривичното дело злоупотреба на службената положба.

Ѓокиќ околу два и пол часа давал изјава во присуство на адвокат, по што изјавил дека не сторил кривично дело или злоупотреба на службената положба, јави Танјуг.

„За овој криминален чин ме обвинуваат мене и членовите на академската заедница кои со месеци се обидуваме да ги артикулираме да донесат некои одлуки кои студентите ги започнаа, професорите и граѓаните на оваа земја ги поддржаа“, рече Ѓокиќ.

Според него, ова не е жалба само против него „туку против сите декани и професори и студенти на нашиот универзитет и на целата академска заедница“.

Пред зградата на полицијата се собраа студенти блокадери и граѓани кои носеа транспаренти и правеа врева со свирежи и вувузели.

Од крајот на минатата година Србија е место на протести и блокади на образовните институции иницирани од студенти и граѓани кои протестираа откако 16 лица загинаа во падот на настрешницата на Главната железничка станица во Нови Сад на 1 ноември минатата година.