Египетскиот фудбалер Мохамед Салах го продолжи договорот со Ливерпул до 2027 година, објави во петокот на својата веб-страница англискиот премиерлигаш.

„Секако дека сум многу возбуден. Сега имаме одличен тим. Имавме одличен тим и претходно. Но потпишав затоа што мислам дека имаме шанса да освоиме други трофеи и да уживаме во мојот фудбал", изјави 32-годишниот фудбалер за кој се шпекулираше дека ќе ги напушти „црвените“ по крајот на сезоната.

Тој додаде: "Тука ги поминав моите најдобри години. Играв осум години, се надевам дека ќе бидат десет. Уживам во мојот живот овде, уживам во мојот фудбал. Ги имав најдобрите години во мојата кариера".

Салах во оваа сезона во Премиер лигата постигна 27 гола и 17 асистенции.

Во досегашниот престој во Ливерпул има одиграно 393 натпревари, на кои даде 243 гола и 109 асистенции.

Салах му помогна на Ливерпул да освои една титула во Премиер лигата, една Лига на шампиони на УЕФА , еден ФА Куп и два Лига купа, заедно со еден УЕФА Суперкуп и едно Светско клупско првенство на ФИФА.