На Хрватска до 2030 година ќе и бидат потребни од 450.000 до 500.000 работници од странство доколку економскиот раст продолжи со сегашното темпо, беше речено на конференцијата на Хрватската стопанска комора „ЕДУКаријера - Преку образованието до професијата на иднината“.

Советникот на претседателот на Хрватската стопанска комора, Петар Мишевиќ, изјавил дека е исклучително важно образовните програми во земјата да се адаптираат, менуваат и ревидираат за да одговорат на потребите на пазарот на трудот, пишува порталот „Пословни“.

Тој додаде дека Хрватска треба да има добро осмислена политика за прифаќање работна сила бидејќи повеќето странци кои моментално работат во Хрватска доаѓаат не само од Југоисточна Европа, туку и од Азија.

„Ако не сакаме паралелни општества, итно треба да работиме на интегрирање на странски работници во нашата заедница“, беше констатирано на конференцијата.

„Интеграцијата на овие работници бара широка соработка не само меѓу работодавачите и државните институции, туку и локалната самоуправа и единиците на самоуправа“, рече Мишевиќ.

Според него, демографските движења во Хрватска и проблемот со низок природен прираст сугерираат дека недостигот на работна сила ќе продолжи да биде проблем во иднина.