Американскиот претседател Доналд Трамп и италијанскaта премиерка Џорџија Мелони денеска во Вашнгтон изразија оптимистички тонови за изгледите САД и Европската унија да постигнат трговски договор во услови на глобален притисок од американскиот лидер за царините.

Трговијата се очекува да доминира во разговорите меѓу Трамп и Мелони, која беше избрана од ЕУ да ги води преговорите за договорот што стана поитен со одлуката на Трамп да воведе царини од најмалку 10 отсто на нациите ширум светот.

ЕУ беше погодена со тарифна стапка од 20 отсто, но како и десетици други нации, на Унијата и беше одобрено одложување од 90 дена за да овозможи преговори.

Трамп рече дека не брза да постигне договор, но додаде дека верува оти ќе биде постигнат трговски договор.

„Се разбира, ќе има трговски договор. Апсолутно. Сакаат да го склучат, многу. И ние ќе направиме трговски договор. Апсолутно го очекувам тоа, но тоа ќе биде фер договор“, им рече Трамп на новинарите додека беше домаќин на Мелони во Белата куќа на работен ручек пред состанокот во Овалната соба.

И Мелони се согласува со оптимистичките најави на Трамп.

„Сигурна сум дека можеме да се договориме и тука сум да помогнам во тоа“, рече таа.

90-дневната пауза на Трамп во спроведувањето на наметнатите царини треба да заврши на 9 мај. Јапонија во средата испрати делегација на високо ниво во Белата куќа на разговори со Трамп, а тој беше исто толку оптимист како и денес.

Трамп рече дека е уверен дека САД исто така ќе можат да направат многу добар договор со Кина.

Мелони утре во Рим ќе го прими американскиот потпретседател Џеј-Ди Венс.