Вториот „Брод на добрината“, кој носи 1.605 тони храна, облека и хигиенски средства од Туркије за Судан, пристигна во Порт Судан во понеделник, додека земјата продолжува да се справува со продлабочена хуманитарна криза.

Хуманитарниот брод, испратен од Турската фондација за хуманитарна помош (ИХХ), беше пречекан со официјална церемонија на прием во Порт Судан, на која присуствуваа амбасадорот на Туркије во Картум, Фатих Јилдиз, членот на одборот на ИХХ, Мехмет Енес Арикан, комесарот за хуманитарна помош на Судан, Селва Адем, и неколку локални функционери.

Во разговор за „Анадолу“, амбасадорот Јилдиз рече дека ова е четвртиот хуманитарен брод испратен од Туркије од почетокот на конфликтот.

„Два беа испратени под координација на Турскиот орган за управување со катастрофи и вонредни состојби (AФAД), а ова е втората пратка испратена од ИХХ“, рече тој.

Јилдиз ја нагласи важноста на континуираната поддршка, особено во услови на извештаи за неодамнешните позитивни случувања во главниот град на Судан.

„Пристигнувањето на таков брод во Судан го зголемува моралот, и за нас и за суданскиот народ. Во време кога Картум се ослободува, Суданците имаат потреба од нашата солидарност повеќе од кога било“, додаде тој.

Мехмет Енес Арикан од ИХХ ги нагласи тековните хуманитарни напори на организацијата под слоганот „Водени од добрината, на пат кон Судан“.

Тој истакна дека Судан е во криза од 15 април 2023 година, кога избувна вооружен конфликт меѓу сопернички воени фракции.

Бродот достави витална хуманитарна помош, вклучувајќи пакети со храна, облека, хигиенски комплети и материјали за засолништа.

Овие залихи ќе бидат дистрибуирани до погодените заедници низ Судан во координација со локалните власти и хуманитарните партнери на терен.