Девојче на возраст од 14 години загина, а десетици лица се повредени во вторник наутро, додека паника и страв ги зафатија жителите за време на земјотрес со јачина од 5,8 степени по Рихтер покрај брегот на Мармарис во југозападната турска покраина Мугла, според турската Агенција за управување со катастрофи и вонредни состојби (АФАД).

Афранур Гунлу, која доживеа напад на паника за време на земјотресот во округот Фетије, беше итно префрлена во болница, но не можеше да се спаси и покрај медицинската интервенција, потврди гувернерот на Мугла, Идрис Акбијик.

Земјотресот, кој се случи на длабочина од 67,91 километар и 10,43 километри од брегот на Мармарис во Средоземното Море, не предизвика големи структурни штети, но стравот ги натера многумина да скокаат од висина или да бегаат од згради.

Гувернерот Акбијик изјави дека 69 лица настрадале од земјотресот, а повредите се претежно резултат на панични обиди за бегство.

„Вкупно 55 граѓани биле примени во болници - 10 со амбулантно возило и 45 пеш. Четиринаесет граѓани одбиле да бидат транспортирани и биле лекувани на лице место“, рече тој, додавајќи:

„Еден пациент е хоспитализиран, 46 се лекуваат во одделот за итни случаи, а осум се отпуштени.“

Првичните проценки покажаа само мали штети на две згради во Мармарис, вклучувајќи пукнатини во ѕидовите, но не е пријавено значително уништување.