Капитенот на Ливерпул и холандски репрезентативец Вирџил ван Дајк го продолжи договорот до јуни 2027 година, соопшти денеска англискиот клуб.

Ван Дајк имаше договор со Ливерпул до 30 јуни годинава, но реши да ја продолжи соработката со клубот од „Енфилд“ на уште две сезони.

"Многу сум среќен и горд. Доживувам многу емоции во овој момент. Чувство на гордост и радост. Среќен сум што можам да го продолжам патувањето што досега го поминав во овој клуб за уште две години. Мојот план секогаш беше да останам во Ливерпул", изјави Ван Дајк, а пренесува официјалниот сајт на клубот.

Британските медиуми наведуваат дека холандскиот фудбалер во Ливерпул ќе заработува околу 400.000 фунти неделно.

Ван Дајк (33) во Ливерпул пристигна на почетокот на 2018 година, а за клубот од Енфилд одигра 314 натпревари и постигна 27 голови. Со англискиот клуб освои осум трофеи.

За холандската репрезентација се појави на 80 натпревари и девет пати се запиша во листата на стрелци.

Пред неколку дена Ливерпул го продолжи договорот и со египетскиот фудбалер Мохамед Салах.