Разговорите меѓу украинските и американските делегации во Саудиска Арабија започнаа „конструктивно“, со дискусии насочени кон обезбедување праведен и траен мир, изјави Андриј Јермак шеф на Кабинетот на украинскиот претседател.

„Средбата со американскиот тим започна многу конструктивно, ние работиме на воспоставување праведен и траен мир“, напиша Јермак на Телеграм.

„Благодарение на американското раководство и европската поддршка, ние Украинците конечно можеме да постигнеме мир. Но, не можеме да дозволиме Руската Федерација да избега од одговорноста“, рече тој.

Говорејќи со новинар во Џеда, Јермак, исто така, ја истакна важноста на безбедносните гаранции за да се спречи идна агресија.

„Гаранциите за безбедност се многу важни бидејќи сакаме оваа агресија никогаш повеќе да не се повтори во иднина. Се разбира, тоа е многу важно. Но, сега мислиме дека е неопходно да се разговара за најважното - како да се започне овој процес. И ние сме многу отворени и сакаме да имаме многу конструктивен, длабок, пријателски, партнерски разговор со нашите американски партнери“, рече Јермак.

Во меѓувреме, украинскиот министер за надворешни работи Андриј Сибиха коментираше на мрежата X дека Киев гледа на состанокот како „одлична можност за унапредување на мирот и развој на стратешкото партнерство Украина-САД“.

„Конструктивната атмосфера докажува дека можеме да ја искористиме оваа можност“, додаде тој. „Украина сака мир како никој друг.

Во украинската делегација се Јермак, Сибиха, министерот за одбрана Рустем Умеров и заменик-шефот на Кабинетот на претседателот Павло Палиса, соопшти Министерството за надворешни работи на Украина.

Од американска страна во разговорите учествуваат државниот секретар Марко Рубио и советникот за национална безбедност Мајк Валц.

Стивен Виткоф, специјалниот пратеник на американскиот претседател за Блискиот исток и Кит Келог, специјалниот пратеник на Трамп за Украина и Русија, кои учествуваа во претходните преговори во Ријад, не се присутни.