Украина соопшти дека договорот за минерали што неодамна го потпиша со САД е важен дел од идните безбедносни гаранции за земјата која воено е нападната од Русија.

Оксана Маркарова амбасадорката на Украина во САД рече дека нивното стратешко партнерство со Вашингтон е важно за Киев и дека се благодарни на американскиот народ за нивната поддршка.

Таа тврдеше дека без „Џавелините“ и другото оружје што САД ѝ го обезбедија на Украина за време на претседателствувањето на Доналд Трамп, Киев не би можел да се одбрани.

Маркарова потсети на договорот за економско партнерство потпишан меѓу Украина и САД кон крајот на минатиот месец, велејќи дека договорот ќе го подигне нивното партнерство на ново ниво. Новиот договор вклучува развој на проекти за минерали, нафта и гас.

„Значи, погледнете, можеби имаме некои несогласувања во некои области, но Украина е посветена на мирот. Украина сака мир повеќе од кој било друг, а нам ни се потребни САД“, рече Маркарова.

„И сега не е само правилно или морално да се прави, фактот дека треба да се поддржи Украина, туку и САД имаат, како што рече вашиот секретар за финансии, интерес и специфичен економски интерес во Украина“, додаде таа.

Во однос на безбедносните гаранции за Украина, амбасадорката рече дека неодамна потпишаниот договор за економско партнерство е, сам по себе, важен дел од пошироката безбедносна архитектура.

„И искрено, тој фонд ќе биде успешен ако Украина е стабилна и мирна. Значи, на некој начин, тоа е важен дел од идните безбедносни гаранции“, рече таа.

Маркарова реагираше и на изјавите на рускиот претседател Владимир Путин за употребата на нуклеарно оружје во Украина.

„Мислам дека во овој момент не е важно како го толкуваме она што го кажува. Само треба да веруваме во она што го кажува и да го разбереме она што го кажува“, рече таа. Тој е закана, не само за Украина, туку и за секој што верува дека нациите треба да живеат мирно, да не ги оспоруваат границите едни на други и само да се фокусираат на економската соработка.“

Во документарниот филм за четврт век на Путин како лидер на Русија, претседателот рече дека немало потреба од употреба на нуклеарно оружје и се надева дека нема да биде потребно.

Тој додаде дека неговата земја има доволно сила и ресурси да го доведе вооружениот конфликт во Украина, кој трае од февруари 2022 година, до неговиот „логичен крај“ и со „резултатот што ѝ е потребен на Русија“.