Специјалниот пратеник на американскиот претседател Доналд Трамп за Блискиот Исток ја обвини палестинската група Хамас за обновените напади во Појасот Газа, повторувајќи ја поддршката на Вашингтон за Израел.

Говорејќи во неделното издание на „Фокс њуз“, Стив Виткоф изјави дека Хамас имал повеќе можности да спречи натамошна ескалација.

„Хамас ја имаше секоја шанса да се демилитаризира, да го прифати предлогот за премостување кој ќе овозможеше 40 или 50-дневен прекин на огнот, при што ќе можевме да разговараме за демилитаризацијата и конечното примирје. Имаше разни можности за тоа, но тие одлучија да не ги искористат“, рече тој.

И покрај ескалацијата, Виткоф истакна дека САД остануваат отворени за дипломатски ангажман.

„Дали би биле отворени за контакт од Хамас? Се разбира – исто како во рускиот конфликт (во Украина). Сакаме да го запреме убивањето, но мора да биде јасно кој е агресорот тука, а тоа е Хамас“, додаде тој.

Израелската Армија на 18 март повторно започна силни напади врз Газа, откако пропадна прекинот на огнот што беше на сила од 19 јануари.

Израелската Армија уби повеќе од 700 Палестинци и повреди над 1.000, откако започна ненадејна воздушна кампања врз Газа минатиот вторник, со што беше прекршен договорот за прекин на огнот и размена на заробеници што беше на сила од јануари.

Над 50.000 Палестинци се убиени, главно жени и деца, а над 113.000 се повредени во бруталната израелска воена офанзива врз Газа од октомври 2023 година.

По кршењето на прекинот на огнот, Израел објави дека ќе ги засили воените операции против Хамас, одбивајќи нови предлози за примирје.

Од друга страна, Хамас го обвини Израел дека ги прекршил своите обврски пред посредничките земји и дека продолжува со геноцидот врз Палестинците во Газа.

Најновата израелска офанзива се случува во период на политички превирања, вклучувајќи го и контроверзното разрешување на директорот на Шин Бет, Ронен Бар, од страна на премиерот Бенјамин Нетанјаху.