Европската Унија е на пат кон постигнување на главната климатска цел за оваа деценија, односно намалување на нето емисиите на стакленички гасови за 54 проценти до 2030 година, во споредба со нивоата од 1990 година, објави денес Европската комисија.

Се додава дека постојните планови за намалување на емисиите на ЦO2 треба да ја доведат ЕУ на еден процентен поен од таа цел, а анализата покажа дека европските влади ги зголемија напорите за намалување на емисиите во последните две години, објавува Ројтерс.

Комесарот за клима на Европската Унија, Вопке Хекстра, изјави дека ЕУ ќе инвестира повеќе во чисти технологии за да се осигури дека индустриите можат да напредуваат во зелената транзиција на Европа.

„Емисиите се намалени за 37 проценти од 1990 година, додека економијата порасна за речиси 70 проценти, што докажува дека климатската акција и растот одат рака под рака. Сега мора да градиме врз основа на овој моментум“, рече Хекстра.

Комисијата, исто така, забележа силен напредок во енергетскиот сектор, каде што обновливите извори покриваа 24 проценти од потрошувачката на енергија во ЕУ во 2023 година.

Земјоделството и транспортот се меѓу секторите што заостануваат, според соопштението.

Земјоделците минатата година организираа повеќемесечни протести низ Европа, критикувајќи ги зелените политики на ЕУ, а секторот во голема мера ги избегнуваше климатските мерки на ЕУ, додека Брисел ги ослабна некои еколошки правила за земјоделците како одговор на протестите.

Влијанието на користењето на земјиштето врз животната средина, што ги вклучува земјоделството и шумарството, е исто така влошено од рекордните шумски пожари, кои ја намалуваат способноста на земјиштето да складира јаглерод.

Извршната потпретседателка на ЕК за чиста, фер и конкурентна транзиција, Тереза ​​Рибера, вели дека ажурираните национални планови за енергија и клима покажуваат дека Зелениот план „не е само цел, туку и начин за модернизација на економиите и инвестирање во индустриски иновации и поголеми можности за Европејците“.

„Можеме да ја исполниме целта од 55 проценти и мора да создадеме услови за да достигнеме 90 проценти до 2040 година“, истакна Рибера.

Комисијата, исто така, проценува дека Унијата е блиску до исполнување на обврзувачката цел за уделот на обновливите извори во потрошувачката на финална енергија, кој изнесува најмалку 42,5 проценти. Уделот ќе биде 41 процент според националните планови за енергетска ефикасност.

Сепак, ЕУ се справува малку полошо кога станува збор за зголемување на енергетската ефикасност. Унијата постави обврзувачка цел за намалување на потрошувачката на енергија за 11,7 проценти до 2030 година.

Но според плановите на земјите-членки, се очекува намалување од само 8,1 процент.

Комисијата ги објави своите проценки врз основа на 24 национални планови. Белгија, Естонија и Полска сè уште не ги доставиле своите планови, а Комисијата ги повика да го сторат тоа што е можно поскоро.