Бродот „Мадлин“ на кој активисти, меѓу кои и Грета Тунберг и актерот Лиам Канингем, пловат кон Газа, нема да добие дозвола да се закотви во Газа, објави израелската армија (ИДФ), а повеќе одлуки во врска со ова ќе објави израелскиот министер за одбрана Израел Кац во текот на денот.

Се очекува бродот да пристигне за една недела, објавува „Јерусалим пост“.

Израел првично размислуваше да дозволи бродот да се закотви во Газа откако безбедносните претставници утврдија дека не претставува закана, но таа одлука подоцна беше поништена.

„ИДФ е подготвен да дејствува на сите фронтови, вклучително и на поморската арена. Ќе дејствуваме соодветно“, објави ИДФ.

Бродот „Мадлин“ што носи хуманитарна помош за Газа ја напушти Сицилија на 1 јуни, и како што се наведува, доколку им беше дозволено да се закотват, активистите ќе останеа заглавени во Газа.

Пред да отплови, Тунберг им рече на новинарите дека без разлика колку е опасна оваа мисија, таа не е ни приближно толку опасна како молчењето на светот пред лицето на одземените животи.

Активистите на бродот, вклучувајќи ја Тунберг и актерот од „Игра на тронови“, Лиам Канингем, ја повикаа меѓународната заедница да ги заштити откако во вторникот беше забележан дрон како лебди над бродот.

Бродот „Медлин“ го управува меѓународната непрофитна организација „Коалиција за слободна флотила“ (ФФЦ), а целта е да се достави хуманитарна помош и да се подигне меѓународната свест за моменталната хуманитарна криза.

Едрилицата носи хуманитарна помош, која вклучува млечна формула за бебиња, пелени, брашно, ориз, филтри за вода, хигиенски производи и медицинска опрема.