Комитетот за безбедност на лекови на Европската агенција за медицинска помош (ЕМА) објави во петокот дека по испитувањето на лековите што содржат семаглутид, активната состојка во лековите „оземпик“, „вегови“ и „рибелсус“, е откриено дека тие имаат „многу редок“ несакан ефект на губење на видот.

Семаглутид, агонист на рецепторот ГЛП-1 , е активната супстанца во одредени лекови што се користат во третманот на дијабетес и дебелина. Семаглутид дејствува на ист начин како и ГЛП-1 (природен хормон во телото) со зголемување на количината на инсулин што панкреасот го ослободува како одговор на храната. 

Ова помага во контролата на нивото на гликоза во крвта. Семаглутид, исто така, го регулира апетитот со зголемување на чувството на ситост кај лицето, а воедно го намалува внесувањето храна, гладот ​​и желбата за храна.

Пациентите кои ги земаат овие лекови за губење на тежина и дијабетес имаат зголемен ризик од развој на ретка болест на очите што може да доведе до губење на видот, според соопштението на ЕМА.

Комитетот за безбедност на лекови на ЕМА започна преглед на лековите на Ново Нордиск во јануари, по загриженоста дека лековите би можеле да доведат до зголемен ризик од развој на неартеритична предна исхемична оптичка невропатија (НАИОН).

НАИОН е нарушување предизвикано од намален проток на крв во оптичкиот нерв во окото, што може да го оштети нервот и да доведе до трајно губење на видот.

Комитетот за безбедност на лекови изјави дека утврдил дека состојбата е „многу редок несакан ефект“ на семаглутид, кој потенцијално влијае на до едно од 10.000 лица кои го земаат лекот.

ЕМА изјави дека изложеноста на семаглутид кај лица со дијабетес е поврзана со двојно зголемување на ризикот од развој на НАИОН во споредба со лицата кои не го земаат лекот.

Регулаторот за лекови на ЕУ побара информациите за лекот што содржи семаглутид да се ажурираат за да го вклучат НАИОН како несакан ефект, со „многу ретка“ појава.

Доколку пациентите доживеат ненадејно губење на видот или брзо влошување на видот за време на третманот со семаглутид, треба веднаш да се јават кај својот лекар. Доколку се потврди НАИОН, третманот со семаглутид треба да се прекине.

Конечната одлука треба да ја одобри Европската комисија.