Преговорите меѓу експертските тимови од Русија и САД во Ријад за Црноморската иницијатива се одвиваат целосно зад затворени врати, изјави денеска портпаролката на руското Министерство за надворешни работи, Марија Захарова.
„Тие навистина се одвиваат зад затворени врати, што значи дека немаше ниту протоколарна снимка за почетокот на преговорите“, рече Захарова, говорејќи на рускиот економски универзитет „Плеханов“, пренесува РИА Новости.
Преговорите меѓу Русија и САД започнаа денеска во Ријад.
Руската делегација ја претставуваат шефот на Меѓународниот комитет на Советот на федерацијата Григориј Карасин и советникот на директорот на Федералната служба за безбедност (ФСБ) Сергеј Беседа.
Најавено е дека разговорите ќе се фокусираат на нијансите на можното обновување на иницијативата за безбедност на пловидбата во Црното Море, за која се разговарало при последниот телефонски контакт меѓу рускиот претседател Владимир Путин и американскиот претседател Доналд Трамп.
Кремљ претходно не ја отфрли можноста на разговорите во Ријад, покрај иницијативата за Црното Море, да се разговара и за други аспекти поврзани со украинското решение.
