Албанија и Северна Македонија ќе добијат предфинансирање според Планот за раст на Европската унија (ЕУ) за да го продолжат својот пат кон интеграција во европскиот блок.

Еврокомесарката за проширување Марта Кос во објава на платформата Х нагласи дека со тоа ќе се промовира спроведувањето на клучните реформи за поттикнување на раст, подобрување на животот на граѓаните и приближување на земјите до ЕУ.

„Честитки до Северна Македонија и Албанија што го поставија темпото на Западен Балкан за да добијат предфинансирање според Планот за раст на ЕУ. Ова треба да даде поттик за спроведување на клучните реформи за поттикнување на раст, подобрување на животот на граѓаните и приближување на земјите до ЕУ“, напиша Кос.

Како што соопштија од Делегацијата на ЕУ во Скопје, во тек е предфинансирање во износ од 52,2 милиони евра и е наменето за поддршка на спроведување на Реформската агенда и обврските што земјава ги презеде со неа.

Потребните структурни промени во Северна Македонија ќе бидат поддржани со вкупно 750,4 милиони евра од Фондот за реформи и раст за Западен Балкан во периодот 2024- 2027 година.

Од друга страна, како што се соопштува, Албанија ќе има пристап до вкупен фонд од 920 милиони евра како дел од Планот за раст на ЕУ за Западен Балкан.

Овој развој доаѓа по подготовката на агендата за реформи од страна на двете земји.

Планот за раст на ЕУ за Западен Балкан има за цел забрзана интеграција на регионот во ЕУ, вклучувајќи прогресивен пристап до единствениот пазар на ЕУ.