Европската унија (ЕУ) ги одложи планираните контрамерки планирани како одговор на американските тарифи за челик и алуминиум до средината на април за да остави време за преговори, изјави во четвртокот комесарот за трговија на Европската комисија, Марош Шефчович.

Шефчович рече дека блокот ќе го координира тајмингот на две групи мерки подготвени од ЕУ против американските царини за челик и алуминиум, а Комитетот за меѓународна трговија ќе се состане со земјите-членки за да добие време за преговори со САД.

Тој истакна дека доколку не се постигне договор, ЕУ ќе го рекалибрира својот одговор, земајќи ги предвид реципрочните тарифи што САД ќе ги воведат на 2 април.

„Овој пристап ќе ни овозможи да обезбедиме цврст, пропорционален, силен и добро калибриран одговор на американските мерки“, рече тој.

Американските царини од 25 отсто за увоз на челик и алуминиум стапија на сила на 12 март.

ЕУ подоцна истиот ден објави дека ќе воведе контрамерки од 26 милијарди евра против САД, при што тарифите ќе стапат на сила во две фази, на 1 и 13 април.

ЕУ објави листа на американски производи кои би можеле да подлежат на царини, вклучувајќи месо, пилешко, мисиркино, млеко и павлака, јаткасти плодови, кафе, овошје и зеленчук, алкохолни пијалоци, гуми за џвакање, електронски цигари, облека, рачни алатки, машини и мотоцикли.

Американскиот претседател Доналд Трамп на 13 март објави дека доколку наскоро не се укине царината од 50 отсто за вискито произведено во неговата земја, ќе биде воведена царина од 200 отсто за сите алкохолни производи увезени од ЕУ.