АҚШ президенті Дональд Трамп кезінде Республикашыларды қолдаған технология миллиардері Илон Масктың жаңа саяси партия құруын «сандырақ» деп сипаттады.
Жексенбі күні журналистерге берген сұхбатында Трамп: «Үшінші партия құру - сандырақ», - деді. «Әрқашан екі партиялы жүйе болған, менің ойымша үшінші партия құру тек шатастырады. Үшінші партия ешқашан нәтиже берген емес. Сол себепті ол мұны ермек көретін шығар, бірақ бұл ақымақтық», - деп қосты ол.
Әлемдегі ең бай адам, 2024 жылғы сайлауда Трамптың басты саяси демеушісі болған Маск Республикашылдардың шығындарды азайту және федералдық қызметкерлер санын қысқарту бастамаларына жетекшілік еткен Үкімет тиімділігі департаментін (DOGE) басқарғаннан кейін президентпен келіспей қалды.
Маск президенттің ішкі шығындарды ұлғайту жөніндегі ауқымды жоспары АҚШ-тың қарызын күрт өсіреді деп Трамппен келіспей қалды және осы жоспарға дауыс берген конгресс мүшелеріне қарсы қолынан келгенін жасауға уәде берді.
Сенбі күні «Tesla», «SpaceX» және «X» иесі бұл мақсатына жету үшін «Америка» партиясын құрды.
«БҰЗЫЛУ ЖӘНЕ ХАОС»
Кейінірек Трамп «Truth Social» сайтында Масктың «шектен шыққанын» және «соңғы бес аптада шектен шығудың зардабын шегіп жатқанын» айтты.
Ол үшінші партияның құрылуы «Толық БҰЗЫЛУ мен ХАОС» тудыратынын айтты.
Трамп электромобильдер шығаратын «Tesla» компаниясына иелік ететін Масктың электр көліктеріне субсидияларды азайтатын шығыстар туралы заң жобасына байланысты оған дұшпандық танытты деген бұрынғы мәлімдемесін қайталады. Ал Маск наразылығының негізінен АҚШ-тың бюджет тапшылығы мен мемлекет қарызын ұлғайту туралы заң жобасынан туындағанын мәлімдеді.
Жексенбі күні Қаржы департаментінің басшысы Скотт Бессент Масктың саяси күреске байланысты қадамын сынға алып, компанияларын басқаруды жалғастыру керектігін атап өтті.
«CNN» тарапынан қойылған «Масктың жоспары Трамп әкімшілігін алаңдатты ма?» деген сұраққа Бессент астарлы сын айтты.
Ол: «Менің ойымша түрлі компанияларындағы директорлар кеңесі оның қайта оралып, өзі жақсы білетін осы компанияларды басқарғанын қалайды», - деді.
«Сондықтан директорлар кеңесі оның кешегі мәлімдемесін жақтырмаған болар және
оны саяси емес, іскерлік қызметке көңіл бөлуге шақырады деп ойлаймын», - деді Бессент.
Маск мамыр айында «DOGE»-ден өзінің компаниядағы міндеттеріне толық уақыт бөлу үшін кеткен болатын. Маск Трамптың жанында болған кезде «Tesla»-ның сатылымы мен имиджіне зиян келген.
