Eýran Ysraýyl bilen konfliktiniň goňşy ýurtlara ýaýramagyny islemeýär, ýöne ýagdaý zerur bolsa başga ýol saýlap biler. Daşary işler ministri Abbas Arakçi, Eýranyň reaksiýasynyň diňe özüni goramaga esaslanýandygyny aýtdy.

Arakçi ýekşenbe güni beren beýanatynda Tähranyň daşary ýurt hüjümlerine jogap berýändigini we bu hüjümler bes edilse Eýranyň reaksiýalarynyň hem gutarjakdygyny aýtdy.

Daşary işler ministri Ysraýylyň Katar bilen paýlaşýan Günorta Pars deňiz gaz ýatagyna guran hüjümlerini "aç-açan agressiýa we örän howply hereket" diýip häsiýetlendirdi.

Şeýle hem, "Çaknyşygy Pars aýlagyna geçirmegiň strategiki ýalňyşlykdygyny we söweşi Eýranyň çäginden çykarmagy maksat edinýändigini" aýtdy.

Ysraýylyň dowam edýän Eýran-ABŞ ýadro gepleşiklerini "puja çykarmaga" synanyşýandygyny öňe süren Daşary işler ministri, gepleşikleriň ylalaşyk üçin ýol açjakdygyna ynam bildirdi.

Tähran şu ýekşenbe güni geçirilmeği meýilleşdirilen gepleşikleriň altynjy tapgyrynda teklip hödürlemäge taýýarlyk görýärdi, ýöne soňky dartgynlylyklar sebäpli gepleşikler ýatyryldy.

Arakçi: "Ysraýylyň hüjümi ABŞ-nyň razylygy we goldawy bolmazdan hiç haçan bolmazdy" diýip belläp, Waşingtonyň soňky hüjümlerde hiç hili rolynyň ýokdugy baradaky beýannamalaryna ynanmaýandyklaryny nygtady.

Arakçi: “ABŞ öz niýetini subut etmek islese, Ysraýylyň Eýranyň ýadro desgalaryna uraýan hüjümlerini ýazgarmalydyr” diýip belledi.

BMG-nyň Ysraýylyň hüjümlerine "biperwaýlygy"

Arakçi, Birleşen Milletler Guramasynyň Howpsuzlyk geňeşini Ysraýylyň Eýrana guran ganly hüjümlerine "biperwaý" bolmak bilen günäkärledi.

Döwlet telewideniýesinde ýaýlyma berlen maslahatda daşary ýurtly diplomatlar bilen geçiren söhbetdeşliginde Arakçi Ysraýylyň hüjüminiň "Howpsuzlyk Geňeşinde biperwaý garalandygyny", onuň deregine Günbatar ýurtlaryň hökümetleriniň bolsa "Ysraýylyň ýerine Eýrany ýazgarýandygyny" aýtdy.