ABŞ-nyň prezidenti Donald Tramp, uruş sebäpli weýran bolan Ukraina rus hüjümlerinden goranmagyna kömek bermek maksady bilen has köp ýarag iberjekdiklerini aýtdy.
Duşenbe güni Ak Tamda metbugat işgärleri bilen geçiren söhbetdeşliginde Tramp Ukrainanyň Russiýa tarapyndan agyr zarbalar bilen urulýandygyny we özüni goramagy başarmalydygyny aýtdy we ABŞ-nyň esasanam goranyş maksatly ýaraglar iberjekdigini aýtdy.
Tramp anna güni metbugat işgärlerine beren beýanatynda, Ukrainanyň özüni goramak üçin Patriot raketalaryna zerurlygynyň bardygyny aýdypdy, emma duşenbe güni şol meseläniň üstünde jikme-jik durup geçmändi.
ABŞ-nyň lideri Ysraýylyň premýer-ministri Benýamin Netanýahu bilen agşamlyk naharyndan ozal beren beýanatynda: "Biz has köp ýarag ibereris. Mejburdyrys. Olaryň özlerini goramaklary zerurdyr. Häzirki wagtda giň gerimli hüjümlere sezewar galýarlar. Uly hüjümlere sezewar galýarlar. Biz has köp ýarag ibermäge mejburdyrys, esasan hem goranmak maksatly ýaraglar ibermelidiris" diýdi.
Russiýanyň Döwlet baştutany Wladimir Putiniň uruşy bes etmezliginiň “özüni lapykeçlige sezewar edendigini” aýdan Tramp: “Bu ýagdaýdan hoşal däldirin” diýdi.
"Asmany goramak"
Ukrainanyň Prezidenti Wladimir Zelenskiý geçen hepdäniň anna güni ABŞ-nyň Prezidenti Donald Tramp bilen geçiren telefon söhbetdeşliginde, Kiýewiň “asmanyny goramak” mümkinçiligini artdyrmak üçin ABŞ bilen bilelikde işleşmek barada karara gelendiklerini habar berdi. Zelenskiý Tramp bilen umumy goranyş önümçiligi, satuw we maýa goýum meselelerini ara alyp maslahatlaşandygyny mälim etdi.
Ukraina barha artýan rus hüjümlerine garşy şäherlerini goramak üçin Waşingtondan möhüm ähmýete eýe bolan Patriot raketalaryny we ulgamlaryny satmagyny talap edýär.
