Russiýanyň Wolga derýasy sebitinde, Ukraina serhedinden takmynan 1300 km uzaklykda ýerleşýän Çuwaşiýadaky bir elektronika kärhanasynyň önümçiligi iki dronyň zawodyň çägine gaçmagyndan soň wagtlaýyn togtadyldy.

Çuwaşiýanyň gubernatory Oleg Nikolaýew duşenbe güni Telegram hasabyndan beren beýanatynda bu hüjümiň, üç ýyldan gowrak wagt bäri dowam eden uruşda Ukrainanyň dronlarynyň Russiýa garşy amala aşyran iň uzak hüjümleriniň biri bolandygyny we adam ýitgileriniň çekilmändigini aýtdy.

Şeýle-de bolsa, Nikolaýew dronlaryň gaçan VNIIR kärhanasynda "işgärleriň howpsuzlygyny üpjün etmek üçin önümçiligi wagtlaýyn togtatmak kararyna gelinendigini" aýtdy.

Dronlaryň zyýan ýetirip-ýetirmändigi barada entek maglumat berilmedi. Nikolaýew başga bir dronuň sebitiň paýtagty Çeboksary sebitindäki ekin meýdanlara gaçandygyny aýtdy.

Moskwanyň harby tagallalary

Russiýanyň Goranmak ministrligi Telegram hasabyndan beren beýanatynda, Ukrainanyň näçe sany uçarmansyz howa ulagyny uçurandygyny däl, eýsem näçe sanysynyň täsirsiz ýagdaýa getirilendigi barada maglumat berdi. Ministrlik Çuwaşiýanyň howa giňişliginde 2 sany uçarmansyz howa ulagyny ýere gaçyrandyklaryny habar berdi. Howa goranyş ulgamlarynyň Russiýanyň howa giňişliginde jemi 49 sany ukrain uçarmansyz howa ulagyny täsirsiz ýagdaýa getirendigi mälim edildi.

Resmi bolmaýan rus we Telegram habar kanallarynda paýlaşylan surat we wideo materiallaryna görä, uçarmansyz howa ulaglarynyň hüjümleri sebäpli Çuwaşiýadaky elektron harby önümçilik desgasynda ýangyn boldy.

Ukrainanyň goşuny hüjümi tassyklap, Russiýanyň Çuwaşiýa sebitindäki elektron önümçilik desgasynyň nyşana alynandygyny aýan etdi.

Kiýew Russiýanyň içindäki hüjümleriniň Moskwanyň söweş tagallalarynyň infrastrukturasyny ýok etmeklige gönükdirilendigini we Russiýanyň Ukraina garşy guraýan hüjümlerine jogapdygyny aýtdy.