Ukraina Russiýanyň paýtagty Moskwa garşy iň uly dron hüjümini amala aşyrdy, azyndan 91 dron bilen guralan hüjüm bir adamyň ölmegine, ýangynlara, aeroportlaryň ýapylmagyna we onlarça uçuşyň başga ýerlere gönükdirilmegine sebäp boldy diýip, Russiýanyň resmileri beýan etdiler.

Russiýanyň Goranmak ministrligi sişenbe güni jemi 337 sany ukrain dronunyň urlup düşürildi, şol sanda 91 sanysynyň Moskwa sebitinde we 126 sanysynyň ukrain güýçleriniň yza çekilýän Kursk sebitinde düşürilendigini habar berdi.

Uly göwrümli dron hüjümi ukrain resmileriniň Saud Arabystanynda ABŞ topary bilen üç ýyllyk uruşda mümkin bolan parahatçylyk gepleşikleriniň esaslaryny kesgitlemek üçin duşuşmaga taýýarlanýan günlerinde we Russiýanyň güýçleriniň Kursk sebitinde müňlerçe ukrain esgerini gabaw astyna almaga synanşýan günlerinde guraldy.

Moskwanyň häkimi Sergeý Sobýanin şäheriň howa goranyş ulgamlarynyň henizem hüjümleri yzyna serpikdirýändigini aýtdy. Moskwada we onuň töweregindäki sebitde azyndan 21 million ilat ýaşaýar hem-de sebit Ýewropanyň iň uly şäherleriniň biri hasaplanýar.

“Moskwa duşmanyň guran iň uly dron hüjümi yzyna serpikdirildi” diýip, Sobýanin Telegramda arkaly beýannama berdi.

Moskwanyň Meri Andreý Worobyýow azyndan bir adamyň ölendigini we üç adamyň ýaralanandygyny aýtdy. Şeýle hem penjireleri döwülen jaýyň fotosuratyny paýlaşdy. Worobyýow Ramenskoýe etrabyndaky köp gatly jaýyň käbir ýaşaýjylarynyň ewakuasiýa edilendigini aýtdy.

Moskwada howsala alamaty ýokdy, şäheriň merkezinde adamlaryň adaty işlerine dowam edýändigi görüldi.

Russiýanyň awiasiýa gözegçilik edarasy, hüjümlerden soň awia howpsuzlygy üpjün etmek üçin Moskwanyň dört howa menzilinde uçuşlaryň togtadylandygyny aýtdy. Şeýle hem Moskwanyň gündogaryndaky Ýaroslawl we Nižniý Nowgorod sebitlerindäki iki howa menzili ýapyldy.

Prezident Donald Tramp Ukrainada parahatçylygy üpjün etmek isleýändigini beýan edýän hem bolsa Russiýanyň Kurskda uly bahar hüjümi we Ukrainanyň Russiýanyň merkezi sebitlerine dron hüjümleri bilen uruş meýdanynda ýagdaý dartgynlaşýar.

Russiýa Moskwanyň üstünde we strategiki desgalaryň üstünde elektron “gümmezler” döretdi, şeýle hem dronlary paýtagtyň merkezindäki Kreml ýetmänkä urup düşürmek üçin howa gorag ulgamyny güýçlendirdi.

Özüniň Russiýanyň güýçleriniň köp sanly dron hüjümleriniň nyşanasyna öwrülen Kiýew, özünden has uly goňşusyna garşy nebit zawodlaryna, howa meýdançalaryna we Russiýanyň strategiki irki duýduryş radar stansiýalaryna dron hüjümleri bilen jogap bermäge synanyşýar.

Ikinji Jahan Urşundan bäri Ýewropadaky iň uly uruş bolan bu çaknyşyk, Birinji Jahan Urşundaky ok-ýarag we artilleriýa söweşi bilen dronlaryň ulanylmagy ýaly täze tehnologiýalaryň utgaşyklygyny görkezýär.

Moskwa we Kiýew täze dronlary satyn almak we ösdürmek, olary täzeçil usullar bilen ulanmak, şeýle hem olary ýok etmegiň täze ýollaryny gözlemek boýunça tagalla edýärler – fermerleriň tüpeňlerinden başlap, ösen elektron öňüni alyş ulgamlary hem muňa degişli bolyp durýar.

Iki tarap hem arzan kommersiýa dronlaryny ölüm howply ýaraglara öwrüp, olaryň önümçiligini artdyrdy. Esgerler dronlardan gorkýandyklaryny aýdýarlar, iki tarap hem dron hüjümleriniň gorkunç wideo ýazgylaryny propaganda maksatly peýdalanýarlar.

Russiýanyň Prezidenti Wladimir Putin, Moskwany urşuň kynçylyklaryndan goramaga synanyşýar we ukrain dron hüjümlerini, şol sanda raýat infrastrukturalaryny nyşana alýan hüjümleri “terrorçylyk” diýip atlandyrýar we jogap berjekdigini beýan edýär.

Russiýanyň iň baý şäheri bolan Moskwa, Sowuk uruşdan bäri iň uly goranyş çykdajylary bilen uruş döwründe hem ösmäge dowam edýär.