Ukrainanyň Prezidenti Wladimir Zelenskiý, Russiýanyň Ukrainanyň demirgazyk-gündogarynda ýerleşýän Harkow şäherine guran howa hüjüminde 1 adamyň ýogalandygyny we 40-dan gowrak adamyň ýaralanandygyny habar berdi.

Zelenskiý çagalaryň otly mowzukly seýilgähiniň golaýyndaky raýat infrastrukturasyna guralan hüjümi “terrorçylykly hüjüm” hökmünde häsiýetlendirdi.

Ukrainanyň Prezidenti Wladimir Zelenskiý şenbe güni Telegram hasabyndan beren beýanatynda: “Biz muny görmediksirän bolup bilmeris. Gözlerimizi ýumup bilmeris. Bu oýun däl. Her gün adamlarymyzdan mahrum galýarys, sebäbi Russiýa onuň jezasyz galjakdygyny pikir edýär” diýip beýan etdi.

Ukrainanyň lideri Russiýanyň goşunynyň Ukraina “ölüm we weýrançylyk getirýändigini” we parahatçylyk gepleşiklerine gatnaşmak islemeýändigini aýtdy.

Zelenskiý: “Ruslar urşy dowam etdirmäge taýýarlyk görýär we ähli parahatçylyk tekliplerini äsgermeýärler” diýdi.

Moskwanyň gepleşiklere ugrukmagy üçin halkara derejedäki basyşyň artdyrylmagynyň zerurdygyny aýdan Zelenskiý, Russiýanyň ozal diňe daşary basyşlar sebäpli gepleşikler stoluna oturandygyny habar berdi.

Zelenskiý front liniýalaryndaky ýagdaýy ara alyp maslahatlaşmak üçin harby resmiler bilen duşuşandygyny hem aýtdy.

Zelenskiý Ukrainanyň harby güýçleriniň 1 sany rus Su-35 harby uçaryny ýere gaçyrandygyny we soňky günlerde 3 sany rus Iskender raketa ulgamyny ýok edendigini mälim etdi.