Çarşenbe güni Saud Arabystany tarapyndan berlen beýannama görä, Indoneziýanyň Prezidenti Prabowy Subianto Saud Arabystanynda saparda boldy.

Indoneziýanyň Prezidenti Subiantonyň Saud Arabystanyna guran resmi saparynyň çäginde iki ýurduň arasynda 27 milliard dollarlyk maýa goýum şertnamasy baglaşyldy.

Iki ýurduň hususy pudagynyň arasynda baglaşylan şertnamalar sap energiýa, nebit-himiýa we awiasiýa pudagynyň ýangyç bilen üpjün edilmegi ýaly birnäçe ugry öz içine alýar.

Sebitleýin meseleler boýunça hyzmatdaşlyk

Sapar hakynda berlen bilelikdäki beýannamada, Saud Arabystany bilen Indoneziýanyň, Palestina meselesine goldaw berýändigi we Gazada dowam edýän gumanitar krizisine alada bildirýändigi nygtaldy.

Iki ýurduň 1967-nji ýyldaky serhetlere laýyklykda paýtagty Gündogar Iýerusalim bolan garaşsyz Palestina döwletiniň gurulmagyna goldaw berýändigi bellenildi.

Halkara çagyryşlara garamazdan Ysraýylyň 2023-nji ýylyň oktýabr aýyndan bäri Gazadaky harby genosidi dowam edýär. Hüjümler sebäpli häzire çenli esasy bölegi zenanlardan we çagalardan ybarat 57 müňden gowrak palestinli ýogaldy.

Beýannamada, Siriýa meselesinde bolsa, Siriýanyň özygtyýarlygyna we bitewiligine sarpa goýulmagynyň möhümdigi nygtaldy.

Saud Arabystany bilen Indoneziýa Ysraýylyň Siriýa guraýan hüjümlerini ýazgardy we Günbatarly ýurtlaryň Siriýa goýan sanksiýalarynyň bes edilmegine kanagatlanma bildirdi.