Russiýanyň prezidenti Wladimir Putin Wolgogratdaky halkara howa menzilini taryhy ady bolan Stalingrad diýip üýtgetmek baradaky karara gol çekdi.

Putin: "Sowet halkynyň 1941-1945-nji ýyllardaky II Jahan urşundaky ýeňşini ebedileşdirmek üçin Wolgograd halkara howa menziline taryhy adyny Stalingrad diýip üýtgetmek kararyna geldim" diýdi.  Bu sözler çarşenbe güni Kreml tarapyndan neşir edilen karara girizildi.

Howa menziliniň ady Putiniň şol gün şähere guran saparyndan soň üýtgedildi. Saparyň çäginde Putin Belarussiýanyň Prezidenti Aleksandr Lukaşenko bilen duşuşyk geçirdi. Sapar II Jahan Urşunyň ýeňşiniň 80-nji ýyllygynyň öňüsyrasynda guraldy.

Ýeňiş güni 9-njy maýda Russiýada we öňki Sowet ýurtlarynda bellenilip geçilýär we II jahan urşy döwründe nasist Germaniýasynyň tabyn bolandygyny ýatladýar. Russiýa bu urşy resmi taýdan Beýik Watançylyk urşy diýip atlandyrýar.

Wolga derýasynyň günbatar kenarynda ýerleşýän Stalingrad 1961-nji ýylda şol wagtky sowet lideri Nikita Hruşýewiň döwründe Wolgograd adyny aldy. Bu üýtgeşiklik, 1953-nji ýylda Sowet lideri Iosif Staliniň ölüminden soň başlanan destalinizasiýa diýlip atlandyrylýan syýasy özgertmeler döwründe bolup geçdi.

Şäher 1942-nji ýylyň awgustyndan 1943-nji ýylyň fewraly aralygynda bolup geçen Stalingrad söweşiniň esasy ýeridi. Bu elhenç harby kampaniýanyň netijesinde SSSR nasist Germaniýasynyň Kawkaza gitmegini togtatmagy başardy, ýöne bu ýeňiş takmynan bir million sowet esgeriniň ölmegine sebäp boldy.