Ýolbaşçylar, anna güni Ukraina bilen ABŞ-nyň mineral şertnamasyny baglaşmagyndan bir gün soň Russiýa tarapyndan guralan hüjümde Ukrainada bir gijede 30-dan gowrak adamyň ýaralanandygyny mälim etdi.

Ukraina bu ylalaşygy, üç ýyldan gowrak wagt bäri rus basyp alyşlygyna garşy söweşýän ýurduna resmi Waşington tarapyndan howpsuzlyk kepilliginiň berilmegine itergi berjek möhüm waka hökmünde görýär.

Zaporožýeniň häkimi İwan Fedorow Telegramdan beren habarnamasynda, “Duşmanyň düýn gije guran hüjüminde 29 adam ýaralandy” diýdi.

Fedorow uçarmansyz howa ulaglary bilen guralan hüjümde ýogalanlaryň arasynda 13 ýaşynda bir çaganyň hem bardygyny belledi.

Habarnamada “Ruslar şäheriň infrastrukturasyna zarba urdy. Ýaşaýyş jaýlaryna we uniwersitete zeper ýetirdi” diýildi.

Häkim Sergeý Lisak Telegramdan beren habarnamasynda, gündogar Dnipropetrowsk sebitinde rus uçarmansyz howa ulagy bilen guralan hüjümde iki adamyň ýaralanandygyny we iki ýerde ýangynyň bolandygyny mälim etdi.

Ukrainanyň milli demir ýol firmasy, Zaporožýedäki lokomatiw abatlaýyş desgasynyň düýn gije uly hüjüme sezewar bolandygyny, hüjümden soň başlan ýangynyň birnäçe sagat dowam edendigini, wakada ýaralananyň bolmandygyny aýan etdi.

Russiýanyň Goranmak ministrligi, howa goranyş ulgamlarynyň bir gejede esasy bölegi Russiýa tarapyndan 2014-nji ýylda anneksirlenen Gara deňiz ýarymadasyndaky Krymda bolmak bilen Ukraina degişli 121 sany uçarmansyz howa ulagynyň hatardan çykarlandygyny mälim etdi.

Ukrainanyň Prezidenti Wolodimir Zelenskiniň ABŞ bilen baglaşylan mineral şertnamasynyň iki tarap üçin bähbitlidigi, emma Kiýew üçin anyk howpsuzlyk kepilligini öz içine almaýandygy baradaky beýannamasyndan soň hüjüm guraldy.

Ukrainanyň lideri ýaranlaryna, Russiýa garşy edilýän basyşyň güýçlendirilmegi üçin çagyryş berdi.