Hindistanyň resmileri Pakistanyň bähbidine içalyçylyk etmekde güman edilýän takmynan on adamy tussag etdi. Bu waka soňky onýyllyklaryň iň agyr dartgynlylygyndan soň ýüze çykdy diýip, ýerli metbugat polisiýa salgylanyp habar berdi.
“NDTV” teleýaýlymy duşenbe güni beren habarynda resmileriň Haryana, Penjab we Uttar Pradeş welaýatlarynda dokuz sany güman edilýän "içalyny" tussag edendigini aýtdy. Penjabyň polisiýa müdiri Gauraw Ýadaw duşenbe güni öz toparynyň iki adamyň "harby taýdan möhüm maglumatlary bermek bilen meşgullanandygyny" anyklandygyny aýtdy.
Polisiýanyň berýän maglumatlaryna görä şol iki adam Täze-Deliniň 6-7-nji maý gijesi Pakistana edilen hüjüm bilen baglanyşykly gizlin maglumatlary Pakistana berendigi güman edilýär. Deslapky derňewler olaryň Pakistanyň howpsuzlyk gullugy ISI bilen göni aragatnaşykda bolandygyny we Hindistanyň Ýaragly Güýçlerine degişli möhüm maglumatlary geçirendigini görkezdi diýip, Ýadaw aýtdy.
Pakistan bu içalyçylyk aýyplamalary barada beýanat berdi. Hindistanyň häkimiýetleri güman edilýän içalyçylyk bilen baglanyşykly jikme-jiklikleri mälim etmediler, ýöne Haryana welaýatynyň polis gullukçylarynyň biri “Hindustan Times” gazetine beren maglumatynda tussag edilmeleriň esasan sosial media işjeňligi bilen baglanyşyklydygyny aýtdy.
Hisardaky polisi gullukçysy Kumar Sawan: "Bu hem bir görnüşli uruş, olar (Pakistan) güýçli adamlary öz pikirlerini ýaýratmak üçin ulanmaga synanyşýarlar" diýip belledi.
Üstümizdäki ýylyň aprel aýynyň 22-sinde Hindistan tarapyndan dolandyrylýan Kaşmirdäki hüjümden soň ýüze çykan çaknyşykda azyndan 60 adam heläk bolupdy. Täze-Deli hüjümiň arkasynda Pakistanyň durandygyny öňe sürdi, emma Pakistan şol günäkärlemeleri düýbünden ret etdi.
Haryana welaýatynda geçen hepde syýahat blogçysy hem şuňa meňzeş aýyplamalar bilen tussag edildi. Polisiýanyň maglumatyna görä güman edilýän aýal Pakistana azyndan iki gezek syýahat edipdir we ýurduň ilçihanasynyň işgärlerinden biri bilen aragatnaşyk saklapdyr.
Tussag edilenleriň arasynda bir talyp, bir howpsuzlyk gullukçysy we bir telekeçi hem bar. “India Today” habarlar gullugy 11 adamyň şeýle günäkärlemeler sebäpli tussag edilendigini habar berdi. Habarlar gullugy güman edilýänleriň sosial media, maliýe höweslendirmeleri, ýalan wadalar, aragatnaşyk maksatnamalary we Pakistana edilen şahsy saparlar arkaly içalyçylyk toruna goşulandygyny habar berdi.
Bu tussag edilmeler ýadro ýaragly goňşularyň 1999-njy ýyldan bäri iň agyr çaknyşygyndan soň boldy. Dört gün dowam eden raketa, dron we artilleriýa hüjümleri doly möçberli uruş howpuny döretdi, emma soňra atyşygy bes etmek boýunça ylalaşyk gazanyldy.
Kaşmir meselesi
Hindistan we Pakistan 1947-nji ýylda Britaniýanyň agalygyndan garaşsyzlygyny almaklaryndan bäri ozalky şazada döwletiniň ugrunda uruşýarlar. Serhet, maşgalalary nesiller boýy böldi.
1989-njy ýyldan bäri Hindistana degişli Kaşmirde pitneçiler garaşsyzlyk ýa-da Pakistan bilen birleşmek üçin gozgalaň turuzýarlar. Täze-Deli bu ýaragly gozgalaňy "Pakistan tarapyndan goldanýan terrorçylyk" diýip häsýetlendirýär, emma Pakistan ony kabul etmeýar.
Soňky hepdelerde resmi Täze Deli musulman guramalaryna, edebiýatyna we mekdeplerine garşy basyşy güýçlendirdi we ol sebitiň dürli künjeklerinde nägilelik döretdi. Şol bir wagtyň özünde Hindistan jedelli territoriýada 82,000-den gowrak kaşmirli bolmadyk adamlara ýaşaýyş şahadatnamasyny berdi, bu bolsa demografiki üýtgetmeler bilen bagly aladalary güýçlendirdi.
Pahalgam hüjüminden soň Hindistanyň garmagyndaky Kaşmirde 1,500-den gowrak adam tussag edildi. Şol bir wagtyň özünde birnäçe hindi şäherinde kaşmirli musulmanlaryň, esasan hem talyplaryň, hindi sagçy toparlaryň hüjümlerine sezewar bolandygy barada habarlaryň gelip gowuşýandygy aýdylýar.
