Indoneziýanyň deňiz güýçleri serkerdeliginden berlen beýannama görä, deňiz güýçleri şu hepde Sumatra adasynyň golaýynda gymmaty 426 million dollara barabar bolan iki tonna metamfetamin bilen kokain daşaýan gämini saklady. Gämidäki biri taýlandyň, 4-i mýanmanyň raýaty bolan 5 adam tussag edildi.

Deňiz güýçleri serkerdeligi, gäminiň yşyklaryny söndürip Riau adalarynda ýerleşýän Tanžung Balai Karimun sebitine tarap barýan mahaly saklanandygyny mälim etdi.

Deňiz güýçleri sekrerdeliginiň metbugat sekretary Arsanta Wardhana mesele hakynda beren beýannamasynda gämide 1,2 tonna kokain bilen 705 kilogram metamfetaminiň ele geçirlendigini aýtdy.

Arsanta Wardhana gämidäki neşe maddalarynyň gymmatynyň 7 trilion rupiaha ýagny 425,94 million dollara barabar bolandygyny belledi.

Taýlandyň baýdagyny göterýän gäminiň Tanžung Balai Karimundaky floda tarap barýandygy bellenildi.

Deňiz güýçleri serkerdeliginiň ýolbaşçysy Fauzi, metbugata beren beýannamasynda, neşe maddalarynyň nireden gelýändiginiň we gäminiň nirä barýandygynyň doly anyklanylmagy üçin işiň gozgalandygyny aýtdy.

Fauzi bu operasiýanyň neşe maddalaryna garşy ýurtda geçirlen iň uly operasiýalardan biri bolandygyna ünsi çekdi.

BMG-nyň Neşe we jenaýat gullugynyň 2024-nji ýyldaky habarnamasyna görä, 2023-nji ýylda Gündogar we Günorta gündogar Aziýada 190 tonna metamfetamin ele geçirildi. Guramaçylykly jenaýat toparlarynyň esasan Taýland arkaly neşe söwdasyny edýändigi anyklandy.

“Altyn üçburçlyk” hökmünde bilinýän Mýanmanyň demirgazyk gündogarynda Taýland bilen Laosyň birleşýän sebitiň, uzak ýyllardan bäri neşe maddalaryny öndürýändigi bilinýär. Şol ýerden çykýan neşe maddalary esasan Aziýanyň jenaýat kartelleri tarapyndan Ýaponiýa we Täze Zelandiýa çenli ýaýradylýar.

BMG-nyň Neşe maddalaryna garşy göreş gullugynyň 2023-nji ýyldaky halkara kokain habarnamasyna görä, 2022-nji ýylda Žawa adasyndaky Merak portunyň golaýynda 179 kilogram kokain ele geçirlipdi. Bu şol döwürda ýurtdaky iň uly kokain operasiýasy hökmünde bellige alnypdy.