ABŞ-nyň Senatynyň agzalary çarşenbe güni iki kanun taslamasyny kabul etmediler. Olaryň biri Prezident Donald Trampyň Katardan sowgat hökmünde kabul eden ýokary amatlykly uçary Harby Howa Güýçleriniň esasy uçary hökmünde ulanylmagy bilen baglanyşyklydy.

Senatorlar Kris Murpy, Kris Wan Hollen, Braýan Şats, Tim Kaýn, Berni Sanders, Meýzi Hirono we Jeff Merkli Senatda Katara 1,9 milliard dollarlyk MQ-9 Reaper dronlarynyň we Birleşen Arap Emirliklerine 1,3 milliard dollarlyk “Çinuk” kysymly dikuçarlaryň satylmagyny togtatmak üçin ses bermäge mejbur etdiler.

Iki taslama hem 56 ses bilen kabul ret edildi. Kabul sesini berenleriň sany bolsa 39.

Murpy ses berişlikden öň öz kärdeşlerine ýüzlenip, şol ýurtlaryň sebitde ABŞ-nyň esasy hyzmatdaşlarydygyny aýtdy.

"Bu ýerde aýtmak isleýän zadymyz, adybir ýurtlar bilen harby gatnaşyklarymyzy hemişelik togtatmak däl, häzirki wagtda şol iki ýurduň prezidente paç tölemäge isleg bildirýärkä, adaty işlere goldaw bermek ýa-da olary tassyklamak mümkin däl" diýip, ol Senatyň mejlisinde aýtdy.

Tramp maý aýynda Ýakyn Gündogara eden saparynyň dowamynda Katarda berilen kaşaň Boeing 747-8 kysymly uçary kabul etjekdigini beýan edip: "Bu sowgady ýurdumyzyň adyndan kabul etmezlik “samsyklyk” bolar" diýipdi.

Bahasy takmynan 400 million dollar bolan sowgat uçar, respublikaçylaryň we demokratlaryň etika we kanunçylyk meseleleri boýunça soraglaryny ýüze çykardy.