Fars habarlar gullugynyň şenbe güni beren habaryna görä, Eýranyň Prezidenti Mesud Pezeşkiýan geçen aý Eýranyň Ýokary howpsuzlyk geňeşiniň Ysraýyl tarapyndan nyşana alynmagy sebäpli aýagyndan ýeňil ýaralandy.
Habara görä, 17-nji iýunda eýranly ýokary derejeli ýolbaşçylaryň Tähranyň günbatarynda howpsuz zolakda maslahat geçirýän pursatlarynda raketa hüjümi guraldy.
Hüjümde binanyň girelgesi bilen çykalgasyna 6 raketa atyldy.
Fars habarlar gullugy, Hizbullahyň lideri Hasan Nasrallaha guralan hüjümde hem şuňa meňzeş ulgamyň ulandygyny habar berdi.
Prezident Pezeşkiýanyň hüjümde ýeňil ýaralanandygy, emma howpsuz ýagdaýda binadan çykandygy nygtaldy.
Habarda, eýranly ýolbaşçylaryň hüjüme içerki maglumatlaryň syzmagynyň sebäp bolandygyna ünsi çekýändigi ýatladyldy.
“Döwlet terrorçynyň aç-açan mysaly”
Fars habarlar gullugy, Eýranly liderleriň ABŞ-nyň Prezidenti Donald Tramp we Ysraýylyň Premýer-ministri Binýamin Netanýahu ýaly şahyslary berk ýazgarandygyna garamazdan, “döwlet terrorçyny aç-açan görkezýän bu hüjümiň Günbatarly ýurtlar we Ysraýyl bilen arabaglanşykly köpçülikleýin habar beriş serişdeleri tarapyndan görmezlikden gelnendigini tankyt etdi.
13-nji iýunda Tel-Awiwiň Eýrandaky ýadro merkezlerini we harby desgalary nyşana alan howa hüjümlerinden soň Ysraýyl bilen Eýranyň arasynda 12 gün dowam eden ýaragly çaknyşyklar başlady.
Eýranyň Saglygy goraýyş ministrligine görä, şol hüjümlerde azyndan 606 adam ýogaldy, 5 müň 332 adam ýaralandy.
Tähranyň Ysraýyla guran raketa hüjümlerinde bolsa 29 adam ýogaldy, 3 müň 400 adam ýaralandy.
Çaknyşyklar 24-nji iýunda ABŞ-nyň goldaw bermeginde gazanylan ylalaşygyň netijesinde bes edildi.
