ABŞ-nyň Prezidenti Donald Tramp, ABŞ-nyň Siriýanyň hökümetine goýlan ähli sanksiýalary bes etjekdigi hakyndaky beýannamasyndan soň çarşenbe güni Saud Arabystanynda Siriýanyň Prezidenti bilen duşuşar.

Tramp, sişenbe güni Riýatda beren beýannamasynda Siriýa goýlan sanksiýalary bes etjekdigini aýtdy.

ABŞ-nyň Prezidenti Tramp, Saud Arabystanynda Siriýanyň Prezidenti Ahmed Şarany kabul etjekdigini belledi.

Trampyň Pars aýlag sebitine gurajak 4 günlük saparynyň birinji gününde Saud Arabystanynyň ABŞ-na 600 milliard dollarlyk maýa goýmagy we ABŞ-nyň Saud Arabystanyna 142 milliard dollarlyk ýarag satmagy boýunça möhüm şertnama baglaşyldy.

Donald Tramp, Saud Arabystanyndan soň şu gün Kataryň paýtagty Doha gider we Emir Şyh Temim bin Hamed Al Sani bilen birlikde beýleki ýolbaşçylar bilen duşuşar.

ABŞ-nyň esasy ýarany Kataryň ABŞ-na ýüz milliardlarça dollarlyk maýa goýmagyna garaşylýar.

ABŞ-nyň esasy ýaranlaryndan biri bolan Ysraýyl bolsa Siriýa goýlan sanksiýalaryň bes edilmegine garşy durýar.

Tramp, sişenbe güni beren beýannamasynda, Saud Arabystanynyň mirasdar Şazadasy Muhammed bin Salman bilen Türkiýäniň Prezidenti R. T. Erdoganyň Siriýa başlangyjy boýunça özüne goldaw berendigini aýtdy.

Siriýanyň ozalky lideri Başar Asady häkimiýetden çetleşdiren oppozisiýa güýçleriniň ýolbaşçysy Al Şara bilen Tramp gatnaşyklary ünsleri özüne çekýär.

ABŞ-nyň Prezidenti Tramp, Katara gurajak saparyndan soň penşenbe güni Abu Dabide Birleşen Arap Emirlikleriniň liderleri bilen duşuşar.

Trampyň anna güni yzyna dolanmagyna garaşylýar. Emma Russiýanyň Prezidenti Wladimir Putin bilen Ukrainanyň Prezidenti Wladimir Zelenksýiniň duşuşygy üçin Türkiýä hem gelip biljekdigi nygtalýar.